Su apang seng taunge nakoạ těmbonangu manga ělang i Yehuwa, Yosua nate su tempong umure 110 su taunge. Su kanandụu wiahe, tau Israel masatia si Yehuwa. Katewe su apang i sie nate, tau Israel něnětạ něněmbah berhala kere tau Kanaan. Hakị u ene, Yehuwa němala si Yabin datung Kanaan něnigěsạ si sire. Tau Israel nẹ̌dorong tul᷊ung si Yehuwa. Hakị u ene, Yehuwa něgělị si sire těmbonang buhu, i Barak. I Barak sarung mẹ̌tul᷊ung tau Israel mẹ̌bal᷊ị si Yehuwa.

Nabi wawine arenge Debora něhabarẹ̌ tatanata bọu i Yehuwa si Barak, ’Pẹ̌bawa 10.000 esẹ, kụ pẹ̌pěrangke dingangu pasukan i Yabin su Sal᷊ụ u Kisyon. Sene, i kau sarung makakala si Sisera, těmbonangu pasukan i Yabin.’ I Barak simimbahẹ̌, ’Iạ sarung měkoạ ene asalẹ̌ i kau tumol᷊e dingangku.’ I Debora nẹ̌bera, ’Ia sarung tumol᷊e. Katewe, bal᷊inẹ i kau měmate si Sisera. Yehuwa naul᷊ị i Sisera sarung patengu sěngkatau wawine.’

Debora timol᷊e si Barak dingangu manga prajurite sarang Wul᷊udu Tabor gunang mẹ̌sasadia mẹ̌pěrang. Su tempong i Sisera nakaringihẹ̌, i sie něngomol᷊ẹ̌ karetang perang dingangu manga  prajurite su lembah wul᷊udẹ̌ ene. Debora naul᷊ị si Barak, ’Sahěllo ini, Yehuwa sarung mětul᷊ung si kau makauntung.’ Barak dingangu 10.000 prajurite limintụ bọu wul᷊udẹ̌ gunang mẹ̌pěrang dingangu pasukan i Sisera.

Yehuwa někoạ Sal᷊ụ u Kisyon nělěba, kụ karetang pasukan i Sisera nal᷊ěbing su legẹ. Sisera timal᷊ang něněntang karetane. Barak dingangu manga prajurite nakauntung, katewe i Sisera nakatal᷊ang! I sie nẹ̌kěmbuni su tendang sěngkatau wawine arenge i Yael. Yael něgělị susu dingangu něnakạu kahiwu si Sisera. Sisera nikahuntikilang ual᷊ingu nal᷊owe. Bọu ene, i Yael marěma-rěmasẹ̌ nẹ̌těngkarani si Sisera kụ němakụ pakung tenda su těmbọe. I Sisera nate.

Barak diměnta gunang mědeạ si Sisera. I Yael siměbang bọu tendane kụ naul᷊ị, ’Suẹ̌e. Iạ měnodẹ taumata dẹ̌deạkeng i Tuang.’ Barak simuẹ̌ kụ nakasilo i Sisera seng nate. Barak dingangi Debora nẹ̌kantarị nẹ̌dalo si Yehuwa, ual᷊ingu i Sie seng nẹ̌tul᷊ung tau Israel nakauntung. Sarang 40 su taunge, Israel tatapẹ̌ piạ pẹ̌darame.