Josué nixnúu ikha xuajñu Jeobá mba̱yu̱ʼ tsiguʼ ga̱jma̱a̱ nikháñun índo̱ nigiʼdoo 110 tsiguuʼ. Israelitas ndiyamajkuíí Jeobá índo̱ Josué xóó xtáa. Mú índo̱ nikháñuu, nigi̱ʼdi̱i̱ ndiyamajkhún xándú xó má eni xa̱bu̱ Canaán. Numuu dí xa̱bu̱ israelitas nánguá ninimbu̱ún kuyáá Jeobá, ikhaa niniñuʼ dí rey cananeo bi̱ nigumbiʼyuu Jabín maʼni dí maguaʼdáá xkujndu. Ikhú, xa̱bu̱ xuajen nitakháñii Jeobá dí mambáñun. Ikha jngó Jeobá nigíiʼ imba̱a̱ bi̱ mayéʼga edxu̱u̱ bi̱ nigumbiʼyuu Barac. Ikha gambáñun xa̱bu̱ dí mbuyamajkuíí Jeobá mbu̱júu̱.

Mbáa a̱ʼgu̱ bi̱ naʼtáriyaʼ dí marigá bi̱ nigumbiʼyuu Débora nindxa̱ʼóo Barac mu ma̱ʼkha̱ gáʼyoo numuu rí ndayóoʼ maʼthúu̱n ajngóo Jeobá: “Ayuʼ náa mañu dí mbiʼyuu Cisón gajmiáanʼ mbá 10,000 xa̱bekha mu muxmijná gajmiún xa̱bi̱i̱ Jabín. Ikhí maʼngaaʼ mataxmíjná ga̱jma̱ʼ Sísara, bi̱ kayá edxu̱u̱ náa ejército”. Barac niriʼñuu Débora: “Maʼgá á mu ikháánʼ nadxuʼ mu̱ʼgua̱”. Ikha niriʼña: “Maʼgá ga̱jma̱á ni̱ndxa̱ʼ, mú gíʼmaa ma̱ta̱ya̱a̱ dí ikháánʼ xátaxíyáa Sísara. Jeobá niʼthí rí mbáa a̱ʼgu̱ gaxíyáa”.

 Débora nitsimuu náa kúbá Tabor ga̱jma̱a̱ Barac mangiin ejército mu makuwá xawii muxmijná. Índo̱ Sísara niʼdxaun, nigímbóó xúgíʼ carro dí naʼni ga̱jma̱a̱ guerra ga̱jma̱a̱ xa̱bi̱i̱ náa mañu. Débora niʼthúu̱n Barac: “Xúgi̱ Jeobá maʼni dí ikháánʼ maʼngaaʼ”. Ikhú Barac ga̱jma̱a̱ 10,000 xa̱bekha niguájtaa náa kúbá mu muxmijná gajmiún ejército ndrígóo Sísara.

Nda̱wa̱á, Jeobá niʼni dí mañu Cisón magajnúu, ikhú carros dí naʼni ga̱jma̱a̱ guerra niʼdu náa ku̱ba̱ʼ mirakha. Sísara nigajtaa náa carro ndrígóo ga̱jma̱a̱ nigáyúu. Barac gajmíi̱n xa̱bi̱i̱ niʼngu̱u̱n nini gajmiún xa̱bi̱i̱ Sísara, mu Sísara nigáyúu ga̱jma̱a̱ ni̱jkha̱ garkaʼuminaʼ náa goʼwóo mbáa a̱ʼgu̱ bi̱ mbiʼyuu Jael. Ikhaa nixnúu yaʼdú maga̱a̱n ga̱jma̱a̱ nitrámaʼ mbá xtíin. Ikhú nigumuu niʼgu numuu dí néʼngo̱o̱ wéñuʼ. Ikhú Jael mañu ni̱ʼkha̱ kanuu, nixkuaʼan mbá estaca ndrígóo guʼwá náa edxu̱u̱, ikhú nikháñuu.

Nda̱wa̱á Barac ni̱ʼkha̱ gáraxi ga̱jma̱a̱ numuu Sísara. Jael nigájnuu náa guʼwá xtíin mu maʼthúu̱n: “Ata̱ʼa̱ʼ mu masngajmiáʼ xa̱bu̱ bi̱ xtaa ratayáaʼ”. Barac nito̱ʼo̱o̱ náa guʼwá xtíin ga̱jma̱a̱ ndiʼyoo rí Sísara kri̱ga̱a̱ nikháñuu. Ikhú Barac ga̱jma̱a̱ Débora nini mbá ajmúú mu muni mba̱a̱ Jeobá numuu dí ikhaa niʼni káwíin náa xa̱bu̱ sia̱nʼ. Xa̱bu̱ israelitas nikuwa tsímáá mbá 40 tsiguʼ.