WEKELO 32
Ɔnɔmbɔdi w’oyoyo ndo wamato ahende waki la dihonga
L’ɔkɔngɔ wa nde nɔmbɔla ekambi waki Jehowa l’edja k’ɛnɔnyi efula, Jashua akavu ele l’ɛnɔnyi 110. L’edja tshɛ kakinde la lɔsɛnɔ, ase Isariyɛlɛ wakatɛmɔlaka Jehowa. Koko l’ɔkɔngɔ wa nyɔi ka Jashua, vɔ wakatatɛ ntɛmɔla dikishi oko wakasalaka ase Kanana. Lam’ele ase Isariyɛlɛ kotetemala la mboyela, Jehowa aketawɔ dia Jabinɛ nkumekanga kɛmɔtshi k’ase Kanana mpɛnyahɛnya ase Isariyɛlɛ wolo. Anto wakalɔmbɛ Jehowa dia mbakimanyiya. Ɔnkɔnɛ, Jehowa akawasha ɔnɔmbɔdi w’oyoyo, mbuta ate Baraka. Nde akahombe nkimanyiya anto dia vɔ nkalolɛ Jehowa.
Dɛbɔra, omvutshi wa womoto, akatomama le Baraka. Nde aki la losango lande lɔnɛ l’oma le Jehowa: ‘Ɔsa apami 10 000, kele tohomane l’asɔlayi waki Jabinɛ l’ashi wa Kishɔna. Lɛkɔ wɛ ayotɔlɛndja Sisɛra, owandji w’asɔlayi wa Jabinɛ.’ Baraka akatɛ Dɛbɔra ate: ‘Dimi layotshɔ paka naka wɛ ambetawɔ dia ntshɔ la mi.’ Nde akate ate: ‘Dimi layotshɔ la yɛ. Koko eya dia aha wɛ mbayodiaka Sisɛra. Jehowa akate dia womoto mbayowodiaka.’
Dɛbɔra akatshu nde la Baraka ndo la asɔlayi ande lo Dikona dia Tabɔra dia toyalɔngɔsɔla dia ndɔ ta. Kam’akoke Sisɛra dui sɔ, nde akatshumanya pusupusu yande ya ta ndo asɔlayi ande l’okidi waki l’ɛse. Dɛbɔra akatɛ Baraka ate: ‘Ɛlɔ ekɔ lushi layokokimanyiya Jehowa dia mbidja otshumba.’ Baraka la anto ande 10 000 wakaholɔ dia tɔlɔ la asɔlayi wa wolo efula waki Sisɛra.
Jehowa akasale dia elola monga lo ashi wa Kishɔna. Pusupusu ya ta yaki Sisɛra yakadinde lo lɔtɛkɛ. Sisɛra akaholɔ oma lo pusupusu kande ko akatatɛ ndawɔ. Baraka nde l’asɔlayi ande wakalɛndja asɔlayi waki Sisɛra, koko Sisɛra akalawɔ! Nde akalawɔ ndo akatoyashɛ lo luudu la dipɛma la womoto ɔmɔtshi lakawelɛka Jaɛlɛ. Jaɛlɛ akawosha abɛlɛ dia nde nnɔ ndo oma laasɔ akawofɛ olangitshi. Ɔndɔshi wa ta wakalɛmbɛ ɔsɔ akalale djɔ. Ko Jaɛlɛ akasɛmɛ otsha le nde ɔkɔkɛ ko akawoke wokɔ l’ɔtɛ ko nde akavu.
Baraka akayayangaka Sisɛra. Jaɛlɛ akatombe oma lo luudu lande la dipɛma ndo akate ate: ‘Ɔtɔ l’etei. Dimi layokɛnya pami katayayange.’ Baraka akɔtɔ l’etei ndo akɛnyi odo wa Sisɛra wokalemi. Baraka la Dɛbɔra wakatombola Jehowa lo mbeembɛ osambo lo woho wakandakimanyiya ase Isariyɛlɛ dia mbidja atunyi awɔ otshumba. Isariyɛlɛ akasɛnɛ lo wɔladi l’edja k’ɛnɔnyi 40.
“Wamato wewoya lokumu l’ɔlɔlɔ wekɔ olui wa woke w’alembe.”—Osambo 68:11
Enda ndo lo...
TSHOTO Y'ETANGELO
‘Lakemala oko mama lo Isariyɛlɛ’
Kakɔna kakoka tetsha ɔkɔndɔ wa lo Bible wendana la Dɛbɔra, Baraka ndo asɔlayi w’ase Isariyɛlɛ lo kɛnɛ kendana la mbetawɔ ndo dihonga?
