Joshuwa wakeendelezya bantu baJehova kwachiindi chilamfu, mpawo wakafwa kali aminyaka iili 110. Chiindi naakali kupona, maIsrayeli bakali kukomba Jehova. Pesi Joshuwa naakafwa, maIsrayeli bakasaanguna kukomba baleza bakubeja, mbuli mbubakali kuchita bantu bakuKkenani. MaIsrayeli bakaleka kuswiilila Jehova, nkinkaako Jehova wakazumizya mwaami wakuKkenani uutegwa Jabbini, kuti abapenzye. Bantu bakakumbila kuti Jehova abagwasye. Nkinkaako, Jehova wakabapa mweendelezi mupya uutegwa Bbarakki. Wakali kuyoobagwasya kuti babweede kuli Jehova.

Musinsimi mwanakazi wakali kutegwa Debbora wakayita Bbarakki. Wakali amulumbe wakali kuzwa kuli Jehova wakuti: ‘Tola baalumi bali 10 000 alimwi ukaswaanane aJabbini abasilumamba bakwe kukalonga kaKkishoni. Uyoomuzunda Sisera silutwe wabasilumamba baJabbini.’ Bbarakki wakabuzya Debbora kuti: ‘Kuti wandisindikila, ndilayinka.’ Mpawo Debbora wakati: ‘Ndilayinka anduwe. Pesi teenduwe pe utajaye Sisera. Jehova waamba kuti Sisera uyoojayigwa amwanakazi.’

Debbora wakayinka aBbarakki abasilumamba bakwe kuchilundu chaTabbori kuti bakalibambile nkondo. Sisera naakamvwa makani aaya, wakabungania basilumamba bakwe angolo zyakwe zyankondo kukalonga kakali afwiifwi ankwakali kukkala. Debbora wakabuzya  Bbarakki kuti: ‘Sunu, Jehova uyookugwasya kuti uzunde.’ Bbarakki abasilumamba bakwe bali 10 000, bakaseluka achilundu kuti bakalwane abasilumamba baSisera bakali amanguzu.

Jehova wakapa kuti kalonga kaKkishoni kazule maanzi. Ngolo zyaSisera zyakasaanguna kubbila mumadaka. Sisera wakasiya ngolo yakwe mpawo wakachija. Bbarakki abasilumamba bakwe bakazunda basilumamba baSisera, pesi Sisera teebakamujaya pe. Wakachija akuyooyuba mutente lyamukayintu wakali kutegwa Jayeli. Jayeli wakapa Sisera malili aakunywa mpawo wakamuvumba atebwe. Sisera wakafwa ng’onzi nkaambo wakali katede. Kuzwa waawo, Jayeli wakamuyubilila, mpawo wakabweza nkanka yatente akwiigankamina amutwe waSisera. Mpawo Sisera wakafwa.

Bbarakki wakasika kung’anda yaJayeli kali kuyanduula Sisera. Jayeli wakazwa mutente lyakwe mpawo wakati: ‘Kuza, ndikutondeezye muntu nguli kuyanduula.’ Chiindi Bbarakki naakanjila mutente, wakajana Sisera kafwide. Bbarakki aDebbora bakayimbila Jehova akaambo kakuti wakagwasya maIsrayeli kuti azunde basinkondonyina. MaIsrayeli akakkala muluumuno kwaminyaka iili 40 yakatobela.