Josoa koa fa baka nitariky vahoakany Jehovah tan̈atiny taon̈o maro, naty izy taminizy 110 taon̈o. Nanompo Jehovah Israelita aby io tamy Josoa mbala velon̈o. Josoa koa fa naty, iro nanjary nanompo sampy, mira Kananita aby io fo. Nimbanjainy Jehovah iro nampijaliny Jabina panjakany Kananita, fotony iro efa tsy nan̈araka volan̈anany. Nangataka vonjy tamy Jehovah iro. Jehovah nan̈amia iro pitariky vaovao. Baraka an̈arany. Izy nan̈ampy olo aby io himpody tamy Jehovah.

Nisy paminan̈ivavy araiky, Debora an̈arany, nirahiny Jehovah nitondra hafatranany nandeha tamy Baraka. Hoizy: ‘Mangalà olo 10 000 lahy miaraka aminao mandeha amy Jabina ndreky tafikinany ambavasahany Kisona. An̈y anaro handresy Sisera, sefony tafiky Jabina.’ Baraka nivolan̈a tamy Debora: ‘Zaho pare handeha, izikoa anao miaraka aminaka.’ Debora nivolan̈a: ‘Zaho hiaraka aminao, fa tsara hainao tsy tan̈anao hamono Sisera, fotony Jehovah nivolan̈a fa tan̈any man̈angy hamono izy.’

Loso Debora ndreky Baraka ndreky maramilany nanonga tamy Bongo Tabora tan̈y handeha hiady. Niaraka Sisera naharen̈y zen̈y,  izy efa namory kalesinany ndreky latoropinany tamy saha tambaniny bongo io. Debora nivolan̈a tamy Baraka: ‘Hataony Jehovah mandresy anao niany.’ Baraka ndreky maramilanany 10 000 amy zay nijotso hiady tamy tafiky Sisera.

Nataony Jehovah tondraka ten̈aranony Kisona. Revo tan̈aty godra kalesiny Sisera aby in̈y. Nialany Sisera kalesinany, izy nilefa. Resiny Baraka ndreky maramilanany tafiky Sisera, fa Sisera mbala tsy nazondro! Izy nilomoay mare, baka io nisitriky tamy tran̈olainy man̈angy zay, Jaela an̈arany. Namiany Jaela ronono izy, baka io nilombofany bodofotsy. Nandry mare Sisera, fotony efa lonja. Jaela nijokojoko nan̈aton̈o izy, baka io nitombohiny raha marangitry lohany Sisera. Naty Sisera.

Navy Baraka handeha hitady Sisera. Jaela niboaka baka tamy tran̈olainany tao, baka io nivolan̈a: ‘Karibo, fa haboakako anao olo tadiavinao.’ Baraka koa fa tafiditry, hitany Sisera nibolain̈y be tarỳ naty. Baraka ndreky Debora nihira nidera Jehovah, fotony nataony Jehovah nandresy fahavalondro iro. Nilamin̈y amy zay ta Israely tan̈atiny 40 taon̈o tafaranizen̈y.