Ali ŵalongolele ŵandu ŵa Yehofa kwa yaka yejinji, Yoswa ŵawile ali akwete yaka 110. Ndaŵi josope jele Yoswa ŵaliji cijumi, Ayisalayeli ŵalambilaga Yehofa. Nambo paŵawile Yoswa, jemanjaji ŵatandite kulambila milungu jakupanganyidwa mpela muŵatendelaga Akanani. Yehofa ŵakundile kuti mwenye ja Akanani jakolanjidwa kuti Yabini jalagasyeje Ayisalayeli ligongo lyakuti ŵalesile kumlambila. Ayisalayeli ŵam’ŵendile Yehofa kuti ŵakamucisye. M’yoyo Yehofa ŵapele mlongola jwasambano jwakolanjidwa kuti Balaki. Jwalakwe jwakamucisye ŵanduwo kuti atandesoni kulambila Yehofa.

Jwakulocesya jwamkongwe jwakolanjidwa kuti Debola ŵatumidwe kuti ajawule kwa Balaki. Jwalakwe jwakwete utenga wakutyocela kwa Yehofa wakuti, ‘Mjigale acalume 10,000 ni mjawule kukuwonegana ni asilikali ŵa Yabini ku kalusulo ka Kisoni. Kweleko cimkamgomece Sisela mlongola jwa asilikali ŵa Yabini.’ Balaki ŵamsalile Debola kuti, ‘Cinjawule naga mmwejo mkulongana ni une.’ Ni Debola jwatite, ‘Cilongane namwe. Nambo mmanyilile kuti mmwejo ngasimum’wulaga Sisela. Yehofa asasile kuti jwamkongwe ni jucacim’wulaga.’

Debola ŵapite yalumo ni Balaki soni asilikali ŵakwe ku Litumbi lya Taboli kukukosecela ngondo. Paŵagambile kupikana yeleyi, Sisela mwangacelewa jwasongangenye magaleta soni makuga ga asilikali m’ciŵata cacaliji pasi  palitumbilyo. Debola ŵamsalile Balaki kuti, ‘Lelo lili lisiku lyele Yehofa camkamucisye kupunda ngondo.’ Balaki ni acalume ŵakwe 10,000 ŵala, ŵatulwice mwacitema m’litumbilyo kukusimana ni asilikali ŵamacili ŵa Sisela.

Kaneko Yehofa ŵatendekasisye kuti kasulo ka Kisoni kagumbale mwamti kasefucile, ni magaleta ga ngondo ga Sisela gatitimile m’matope. Ni jwalakwe jwagambile kugaleka magaletago ni kutanda kutila. Balaki ni asilikali ŵakwe ŵagomece asilikali ŵa Sisela, nambo Siselajo jwatisile. Jwawutwice ni jwajuŵile m’citenti ca jwamkongwe jwakolanjidwa kuti Yayeli. Jwamkongweju ŵampele Sisela mkaka kuti amwe soni ŵampele libulangete kuti aliwunicile. Jwalakwe jwapesile mnope mwamti jwagonile lugono. Kaneko Yayeli jwajesile mwakunyeng’ama ni jwajigele cicili nikumkomela Sisela mumtwe ni jwawile.

Balaki jwayice kukumsosasosa Sisela. Yayeli jwakopwece m’citenti cakwe ni jwatite, ‘Mjinjile kuti namlosye mundu jumkumsosajo.’ Balaki jwajinjile ni jwam’weni Sisela ali kwala jwam’we. Balaki ni Debola ŵajimbile nyimbo jakum’yamika Yehofa ligongo lyakwakamucisya Ayisalayeli kwagomeka acimmagongo ŵawo. Kutandila pelepo Ayisalayeli ŵatemi mwamtendele kwa 40.