Tingbafuo Yosua ngbembatayo fu ga Yekova aboro tipa dungu agarã, ko akpi na garã ko 110. Ti gu regbo Yosua adu ni ungako, aYisaraere anaairiso Yekova airiso. Ono tingbafuo ko kpi, i atona kaa iriso akpiahe wakina aKanano. Yekova ambu bakindo aKanano rimoko angia Yabina ko sa raka fu aYisaraere ni kpakarakpakaraha, mbiko aYisaraere aakanga kuti pekafuo Yekova te. Aboro azungadi Yekova tipa undo. Sidu Yekova afu vovo bangbembatayo fuyo nga Baraka. Si adu nga ko nika undo aboro i karaga tiyo fuo Yekova.

Gu denebi nangia Debora, akedi sunge fuo Baraka. Ri adu na pangbanga ngba ri, Yekova akedi ri na ni fuoko nga: ‘Mo di akumba 10,000, na ki ndu ka gbia ga Yabina riivura rogo gu di nga Kisona. Yo du mo nika dia ni be Sisera, nga gu barutiriivura nga ga Yabina ko.’ Baraka aya fu Debora wẽ: ‘Mi rengbe ka ndu, kina gu ka si du nga ani nandu na mo wa sa.’ Ri aya: ‘Ani nika ndu andu na oni. Ono mo ini gupai nga, anga mo du nika imo Sisera te. Yekova aima gumba gupai nga, dee du nika imoko.’

ADebora andu na Baraka gbiati gako riivura kina boro ku  Bagangara Tabora yo ka mbakadatiyo tipa vura. Nibasa tifuo Sisera gi gipai re, ko adungura gako angbagidavura na abasovura ku ngboongbo rago yo. Debora aya fu Baraka wẽ: ‘Areme nga gu uru, Yekova nika fu diabese foro.’ Baraka na gako akumba nadu 10,000 ki zorõ rii bagangara yo ka ndu fuo ga Sisera nyanyaki riivura.

Yekova asa gu di nga Kisona si hi. Ga Sisera angbagidavura ki kongo ku rogo dogoro yo. Sisera ambu gako ngbagidavura na ki tona ka ora. Baraka na gako abanzengere ki dibe ga Sisera riivura, ono Sisera aima ora! Ko azubo na ki gbu tii gu bamburoko nga ga gu dee nangia Yaere. Ri afu mamunyaa fuko ko mbirihe na ki dadi ko na batania (barangiti). Gi kere basovura re ati ni rame mbiko ko aima mbu gbe. Yaere agbisi ku patiko yo yee na ki mo naari ti bamburoko ki banga ru ti riko. Ko ki kpi.

Baraka aye kini ngere tipa Sisera. Yaere ki kuru tii gari bamburoko ki ya: ‘Oni ye ku dimo no. Mi nika yugo bara gu kumba furoni oni angera tipa ko.’ Baraka ki ndu ku dimoyo ki bi kangba Sisera si napi api sande. Baraka na Debora ki tambua Yekova rogo bia yo tipa fuko diabese fu aYisaraere be avurayo. AYisaraere agbia zereda tifuo agarã 40.