Sanga terjadi kelihen i Israel, sekalak diberu si gelarna Naomi pindah ku taneh Moap ras dilakina bage pe dua anakna. Dungna, mate me dilaki Naomi. Anakna si dua e erjabu ras kalak Moap eme Rut ras Orpa. Tapi, anakna si dua e pe mate ka.

Sanga ieteh Naomi enggo dung kelihen si terjadi i Israel, mulih ia ku rumahna i Israel. Rut ras Orpa pe ikut. Tapi bas perdalanen, nina Naomi man kalak e ‘Enggo mehuli perbahanen kena man aku bage pe man anak-anakku. Erjabu ka lah kena. Mulihlah kena ku Moap.’ Nina kalak e, ‘Keleng ate kami kam! La kami nggit sirang ras kam.’ Terus isuruh Naomi kalak e mulih. Dungna, Orpa mulih ku Moap, tapi Rut tetap ras Naomi. Nina Naomi man Rut, ‘To, ikutken Orpa mulih ku bangsana ras ku dibata-dibatana. Mulihlah kam ku rumah mamakndu.’ Tapi nina Rut ngaloi, ‘La ateku sirang ras kam. Bangsandu pagi jadi bangsaku ras Dibatandu jadi Dibataku.’ Menurutndu, uga perasan Naomi sanga ibegina si ikataken Rut?

Rut ras Naomi seh i Israel bas musim rani gandum. I bas sada wari lawes Rut ku juma Boas guna muat sisa peranin. Boas eme anak Rahap. Ibegina berita kerna Rut, kalak Moap si setia nemani Naomi. Isuruhna kalak si erdahin bas jumana gelah tadingkenna sisa peranin man Rut.

 Bas berngina, isungkun Naomi me Rut, ‘Bas juma ise kam ndai erdahin?’ Nina Rut, ‘Bas juma Boas.’ Nina Naomi, ‘Keluarga dilakiku kap Boas e. Teruslah kam erdahin i je ras diberu si deban. Aman nge kam i je.’

Rut terus erdahin i juma Boas, seh asa dung musim peranin. Iperdiateken Boas maka Rut e diberu si rajin ras mehuli kel. Bas jaman si mbarenda, adi sekalak dilaki mate tapi la lit anakna, diberuna e arus iempoi keluarga si dilaki e. Emaka iempoi Boas me Rut. Lit me anak kalak e, gelarna Obed. Ia me bulang Raja Daud. Meriah kel ukur teman-teman Naomi. Nina kalak e, ‘Nggo bereken Jahwe si Rut man bandu, si seh kel ulina, janah gundari nggo ka lit kempundu. Terpujilah Jahwe.’