Wagati dɔ la, kɔngɔ donna Israɛl jamana na. O tuma na, muso dɔ tagara sigi Mowabu jamana na, ale n’a cɛɛ ani a dencɛ fila. O muso tɔgɔ ko Nawomi. Kɔfɛ, Nawomi cɛɛ sara. A dencɛw ye Mowabu sunguruw furu: Ruti ni Ɔripa. A fɔ man di, nka Nawomi dencɛw nana sa.

Nawomi y’a mɛn ko kɔngɔ banna Israɛl jamana na minkɛ, a y’a latigɛ ka kɔsegi a ka dugu la. Ruti ni Ɔripa tugura a kɔ. Nka sira kan, Nawomi y’a fɔ u ye ko: ‘Aw tun ye muso ɲumanw ye ne dencɛw fɛ ani buranmuso ɲumanw ye ne fɛ. Ne b’a fɛ aw ka furu sɔrɔ tugun. Aw ye kɔsegi ka taga aw ka dugu la Mowabu.’ O musow ko: ‘I koo ka di an ye! An t’a fɛ ka bɔ i kɔ.’ Nawomi tora k’a fɔ u ye k’u ka kɔsegi. A laban, Ɔripa kɔsegira, nka Ruti ma sɔn ka kɔsegi. Nawomi y’a fɔ a ye ko: ‘Ɔripa be kɔsegira aw ka mɔgɔw n’aw ka alaw fɛ. Tugu a kɔ.’ Nka, Ruti y’a fɔ a ye ko: ‘Ne tɛna bɔ i kɔ! E ka mɔgɔw bena kɛ ne ka mɔgɔw ye, e ka Ala bena kɛ ne ka Ala ye.’ Ele fɛ, o kumaw ye mun lo kɛ Nawomi la?

Ruti ni Nawomi sera Israɛl ɔrizi sumantigɛ wagati daminɛ na. Loon dɔ, Ruti tagara fɛfɛri kɛ cɛɛ dɔ ka foro la. O cɛɛ ye Rahab dencɛ ye, a tɔgɔ ko Bowazi. Bowazi y’a mɛn ko Ruti ye Mowabu muso ye min tora kantigiya la ni Nawomi ye. A y’a fɔ a ka baarakɛdenw ye k’u ka ɔrizi dɔ to foro kɔnɔ Ruti k’o cɛ.

 O loon wulafɛ, Nawomi ye Ruti ɲininga ko: ‘I ye baara kɛ jɔn lo ka foro la bi?’ Ruti ko: ‘Cɛɛ dɔ ka foro la, a tɔgɔ ko Bowazi.’ Nawomi y’a fɔ a ye ko: ‘Bowazi ye ne cɛɛ ka somɔgɔ dɔ lo ye. To ka baara kɛ a ka foro la ni muso misɛn tɔɔw ye. Foyi tɛna i sɔrɔ yen.’

Ruti tora ka baara kɛ Bowazi ka foro kɔnɔ fɔɔ sumantigɛ nana ban. Bowazi y’a kɔrɔsi ko Ruti be baara kɛ kosɔbɛ ani ko muso ɲuman lo. O wagati la, ni cɛɛ dɔ tun sara, n’a ma dencɛw sɔrɔ, a somɔgɔ dɔ tun be se k’a ka muso ta. O kama, Bowazi ye Ruti furu. U ye dencɛ sɔrɔ k’a tɔgɔ la ko Obɛdi. Ale lo nana kɛ masacɛ Dawuda mamacɛ ye. Nawomi teriw ninsɔndiyara. U y’a fɔ ko: ‘Jehova kɔnna ka Ruti d’i ma min ye i minɛ ka ɲɛ. Sisan, i ye mamaden sɔrɔ. Jehova tɔgɔ ka tando.’