Sang tiggulutom sa Israel, ang Israelinhon nga si Noemi nagsaylo sa Moab upod sa iya bana kag duha ka bata nga lalaki. Sang ulihi, napatay ang bana ni Noemi. Ang iya mga bata nangasawa kay Rut kag kay Orpa nga mga Moabnon. Ang masubo pa gid kay sang ulihi, napatay man ang iya mga bata.

Sang nabalitaan ni Noemi nga wala na sing tiggulutom sa Israel, nagdesisyon sia nga magpauli. Nag-upod sanday Rut kag Orpa sa iya sang naglakat sia, pero sang ara na sila sa dalan, ginsilingan sila ni Noemi: ‘Maayo kamo nga mga asawa sang akon mga bata kag nangin maayo man kamo nga mga umagad sa akon. Gusto ko nga makapamana kamo liwat. Pauli kamo sa Moab.’ Nagsabat sila: ‘Palangga ka namon! Indi ka namon pagbayaan.’ Padayon sila nga ginsilingan ni Noemi nga magpauli. Sang ulihi, nagbalik si Orpa, pero si Rut wala. Ginsilingan sia ni Noemi: ‘Nagbalik na si Orpa sa inyo katawhan kag sa inyo mga dios. Upod ka na sa iya.’ Pero si Rut nagsiling: ‘Indi ko ikaw pagbayaan. Ang imo katawhan mangin akon katawhan, kag ang imo Dios mangin akon Dios.’ Ano sa banta mo ang ginbatyag ni Noemi sa ginsiling ni Rut?

Nag-abot si Rut kag si Noemi sa Israel sang nagasugod pa lang ang tig-alani sang sebada. Isa ka adlaw, nanguha si Rut sang nabilin nga mga uhay sa uma ni Boaz nga bata ni Rahab. Nabatian ni Boaz nga si Rut isa ka Moabnon nga nag-unong kay Noemi. Ginsilingan niya ang iya mga tinawo nga magbilin sing mga uhay para may makuha pa si Rut.

 Pagkagab-i, ginpamangkot ni Noemi si Rut: ‘Kay sin-o ka uma nagkadto kaina?’ Si Rut nagsabat: ‘Sa uma ni Boaz.’ Ginsilingan sia ni Noemi: ‘Paryente sang akon bana si Boaz. Didto ka lang gihapon kadto sa iya uma upod sa iban nga pamatan-on nga babayi para wala sing manghilabot sa imo.’

Sa uma gihapon ni Boaz nagakadto si Rut asta natapos ang pagpangani. Nakita ni Boaz nga mapisan gid si Rut kag maayo gid sia nga babayi. Sadto nga panahon, kon mapatay ang lalaki nga wala sing bata, pangasaw-on sang iya paryente ang iya nabalo nga asawa. Gani, ginpangasawa ni Boaz si Rut. Nagbata sila sing lalaki, kag ginngalanan nga Obed, nga sang ulihi nangin lolo ni Hari David. Nalipay gid ang mga abyan ni Noemi. Nagsiling sila: ‘Una, ginhatag ni Jehova sa imo si Rut, nga nangin maayo gid sa imo, kag subong may apo ka na. Dayawon si Jehova.’