Hĩndĩ ĩmwe kwarĩ na ng’aragu Isiraeli, mũtumia ũmwe wetagwo Naomi marĩ hamwe na mũthuri wake na anake ao eerĩ nĩ maathamĩire Moabi. Mũthuri wa Naomi nĩ aacokire agĩkua. Nao anake acio ao nĩ maahikirie airĩtu erĩ kuuma bũrũri wa Moabi meetagwo Ruthu na Oripa. Ũndũ wa kĩeha nĩ atĩ anake acio nĩ maacokire magĩkua.

Rĩrĩa Naomi aaiguire atĩ ng’aragu nĩ yathirĩte Isiraeli, nĩ eeciririe acoke mũciĩ. Ruthu na Oripa nĩ maambĩrĩirie thabarĩ hamwe nake, no marĩ njĩra-inĩ Naomi aamerire ũũ: ‘Mũraarĩ atumia ega harĩ niĩ na harĩ ariũ akwa. Ndĩrenda mũthiĩ mũkahike rĩngĩ. Cokai kwanyu Moabi.’ Nao atumia acio makĩmwĩra ũũ: ‘Nĩ tũkwendete! Tũtingĩenda gũgũtiga.’ No Naomi aaikarire akĩmeeraga macoke kwao. Mũthia-inĩ wa ũhoro, Oripa nĩ aacokire, no Ruthu ndetĩkĩrire gũcoka. Naomi eerire Ruthu ũũ: ‘Oripa nĩ acoka kũrĩ andũ ake na ngai ciake. Cokania hamwe nake, ũthiĩ kũrĩ mũciĩ wa maitũguo.’ No Ruthu aakĩmwĩra ũũ: ‘Ndigũgũtiga! Andũ anyu megũtuĩka andũ aitũ, nake Ngai waku atuĩke Ngai wakwa.’ Ũgwĩciria Naomi aaiguire atĩa rĩrĩa Ruthu aamwĩrire ũguo?

Ruthu na Naomi maakinyire Isiraeli rĩrĩa cairi yagethagwo. Mũthenya ũmwe Ruthu nĩ aathire kũhaara cairi kwa mũndũ wetagwo Boazu ũrĩa warĩ mũriũ wa Rahabu. Boazu nĩ aaiguire atĩ Ruthu aarĩ Mũmoabi watũũranĩtie na Naomi arĩ mwĩhokeku. Eerire aruti ake a wĩra matige cairi nyingaingĩ nĩguo Ruthu one ya kũhaara.

 Hwaĩ-inĩ ũcio Naomi nĩ oririe Ruthu ũũ: ‘Ũmũthĩ uuma kũruta wĩra kũ?’ Nake Ruthu akĩmwĩra: ‘Ngũrutaga wĩra kwa mũndũ wĩtagwo Boazu.’ Naomi aamwĩrire ũũ: ‘Boazu nĩ wa famĩlĩ citũ. Thiĩ na mbere kũruta wĩra gwake mũrĩ hamwe na airĩtu arĩa angĩ. Kũu kũrĩ na ũgitĩri.’

Ruthu nĩ aathire na mbere kũruta wĩra kwa Boazu nginya rĩrĩa wĩra wa kũgetha wathirire. Boazu nĩ onire atĩ Ruthu nĩ aarutaga wĩra na kĩyo na aarĩ mũtumia mwega. Matukũ-inĩ macio, mũthuri angĩakuire atagĩte kaana ga kahĩĩ, mũtumia wake nĩ aahikagio nĩ mũndũ ũmwe wa famĩlĩ ciao. Nĩ ũndũ ũcio Boazu nĩ aahikirie Ruthu na makĩgĩa na mwana wetagwo Obedi, ũrĩa wacokire gũtuĩka gukawe wa Mũthamaki Daudi. Arata a Naomi nĩ maakenire mũno. Maamwĩrire ũũ: ‘Jehova aambire gũkũhe Ruthu ũrĩa ũkoretwo arĩ mwega mũno harĩ we, na rĩu nĩ wagĩa na kaana ga gũgwĩta cũcũ. Jehova arogoocwo.’