Omughulhu e Israeli yabya enzalha nene, Omuisraeli oyukahulhawa mwa Naomi, mwira wiwe n’abaghalha biwe babiri mubahumira e Moabu. Enyuma waho, mwira wa Naomi mwaholha. Baghalha biwe mubathahya Ruta na Orupa, Abanya Moabu. Eky’obulighe, baghalha ba Naomi nabu mubaholha.

Naomi abere akowa ngoku enzalha yabirihwa e Israeli, mwathwamu erisuba ewabu. Ruta na Orupa mubaghenda nayu, aliwe babere bane omwa nzira, Naomi mwababwira athi: ‘Mwabya bakali babuya ba baghalha baghe kandi balyana baghe babuya. Nganzire imwathasyathahibwa. Musube ewenyu e Moabu.’ Abakali mubabugha bathi: ‘Thukwanzire! Sithwanzire erikulhwako.’ Naomi mwabahathikana athi baghende. Erighunzerera, Orupa iyo mwasubulha, aliwe Ruta mwamughanirako. Naomi mwamubwira athi: ‘Orupa amabirisuba eyiri abandu biwe n’esyonyamuhanga siwe. Nawu wughende nayu, wusube omo nyumba ya koyo wawu.’ Aliwe Ruta mwabugha athi: ‘Singendi kulhuako. Abandu bawu basyabya bandu baghe, na Nyamuhanga wawu asyabya Nyamuhanga waghe.’ Wukalengekanaya Naomi mwayowa athi Ruta akamubwira athya?

Ruta na Naomi mubahika e Israeli ekisusu kikatsuka erigheswa. Kiro kighuma, Ruta mwaghenda eriyasongya-songya ekisusu ekikasighalira enyuma omw’irima ly’omulhume oyukahulhawa mwa Boazi, mughalha wa Rahabu. Abya iniabiriowa ngoku Ruta ni Munya Moabu oyuwabya iniabiribya muthaleghulha oku Naomi. Mwabwira abakoli biwe athi ibanasigha enyuma y’ekisusu kike ekya Ruta angakuma-kuma.

 Erigholho eryo, Naomi mwabulya Ruta athi: ‘Munabwire muwukakolera omw’irima lyandi?’ Ruta mwabugha athi: ‘Omw’irima ly’omulhume oyukahulhawa mwa Boazi.’ Naomi mwamubwira athi: ‘Boazi ni muhughu wa mwira waghe. Wubye wukakolera omw’irima liwe n’abandi bakali. Eyo wukendibya buholho.’

Ruta mwalholha embere erikolera omw’irima lya Boazi erihika aho erighesa lyahwera. Boazi mwalhangira ngoku Ruta abya akakolha kutsibu kandi ini mukali mughenge. Omwa biro ebyo, omulhume anabya amaholha kandi isyawithe baghalha, omuhughu wiwe iniakasighalhaya mukali wiwe. Neryo Boazi mwathahya Ruta. Mubabutha mughalha n’erimwahulha mwa Obedi, oyuwabya wabere sokulhu w’Omwami Dawudi. Abanywani ba Naomi mubatsema. Mubabugha bathi: ‘Erimbere, Yehova mwakuha Ruta, oyuwabirikubera mwalyana mubuya, kandi na lino wamabiribana omwitsikulhu. Yehova apipawe.’