Teleŋ yima bɛnduaŋ ma del Isɔluɛiyo, mi wana lanɔ Isɔluɛinɔ pilɛ diolaŋ aa Nawomi, kua o lɛŋnde Mowabileŋ niŋ nda pɔnɔ ndɔ a puaa ndaa ŋiɔɔŋnda. Loŋ nda lo ni mi pɔnɔ ndɔ wu. Okoŋ, mi puaa nduaa ŋiɔɔŋnda chua laanduaa. Hoo diolaŋ aa Lutu, opilɔɔ aa Ɔpa. Mowabaitiiya nda wa ni. Mɛɛ teleŋ tiŋ hiou, mi puaa nduaa ŋiɔɔŋnda bɛɛ wu. Mi hei tɛɛmbuu ndu kɔllo tau.

Mɛɛ Nawomi tuei maa yima bɛnduma wa Isɔluɛi yaŋ ma chuu, mbo kɛɛsiaa le miiŋgoo o ndu lo. Mi Lutu nda Ɔpa kua a ndu latulu. Kɛ mɛɛ nda fuuluu o nɛi tɛɛŋ, mi Nawomi dimul nda aa: ‘La wa laanduaa kɛndɛ le puaa niaa. Nduyɛ, I wa bɔɔ a kɔl kɛndɛ le waa kalalɛi nya. I yeema nya mi la chal vɛlɛ o nɔlaŋ. Lelaŋ, la miiŋgu o nya lo Mowabi.’ Mi waŋ laanduaa haa dimul ndu aa: ‘Ŋ kaala num! Ŋ yeema miŋ faŋaŋ num kɔɔli le.’ Mi Nawomi hiau lachi a nda dimullo maa a miiŋgu. O mɛɛlulaŋ kpɔŋ, mi Ɔpa miiŋguŋ. Kɛ Lutu ndu miiŋgu le. Mi Nawomi dimul ndu aa: ‘Ɔpa ndu miiŋguŋ o wanaa nduaa lo vɛlɛ a o mɛlɛkaa nduaa lo. La miiŋgu latulu, mi la kuɛ o kalaa nyaa lo.’ Kɛ mi Lutu dimul ndu aa: ‘I cho num faŋaŋ kɔɔli le. Yuŋgu numndo cho wa yuŋgu nuu ni. Nduyɛ, Mɛlɛka numndo cho wa Mɛlɛka nuu ni.’ O yiyaŋ numndo niŋ, vɛɛ kɔllo wa yɛ Nawomi mɛɛ Lutu dimul ndu sɔɔŋ muŋ?

Teleŋ nda kandu baliiyoŋ kowɔɔ wo kinɛi Nawomi nda Lutu fuuluu Isɔluɛi ni. Paale pilɛ, mi Lutu kua baaliiŋ ndaa mɛi kɔɔli woŋ kowɔɔ o chiɛi po pilɛ niŋ diolaŋ aa Bowaa. Bowaa wo hoo yɛ, po Luehabi wo o wa ni. Mi Bowaa tuɛi maa Mowabaitiinɔɔ Lutu cho ni. Nduyɛ maa, ndu holnuŋ Nawomi ni o feŋaŋ ndu kɔɔli le. Mbo dimul wanaa nduaa walla le ma mɛi baliiyoŋ ŋtiŋ kɔɔli, le mi Lutu chɔuviaa.

 Ichɔl koŋ, mi Nawomi nyuna Lutu aa: ‘O chiɛi nɛɛnɛ niŋ ŋ niilu yɛ hau wallo?’ Mi Lutu mulul ndu aa: ‘O chiɛi po pilɛ niŋ diolaŋ aa Bowaa.’ Mi Nawomi dimul ndu aa: ‘Wanayɛi pɔnɔ nuu Bowaa cho ni. Hiou lachi a wallo tosaa o chiɛi nduɛi niŋ, latulu a waŋ laanduaa feleŋguaa cheleŋ. A cho num nyɛ o nyɛ yɔŋ loŋ te.’

Lutu lo wallo o chiɛi Bowaa ve niŋ haaa ma chii baliiyoŋ kowɔɔ. Mi Bowaa cha maa wallo pila Lutu tosa ni. Nduyɛ o wa bɔɔ wana lanɔ kɛndɛ. O teleŋ koŋ niŋ, te poo ndoo chua pɛ lanɔɔ mbo vilu ŋchuau a ndu le mbo vi, wanayɛi nduɛi chua lanɔ o mɛi koŋ ndo. Le hei, mi Bowaa chua Lutu o nɔɔ niŋ. Ma vialu poo, ma ke ndu diolaŋ aa Obɛɛ. Nduyɛ po nda velu koŋ ndo, mbo simnuŋ finya mama Masaa Deeve wo. Mi chaaŋaa Nawomi wa naŋ kɔl tau. Ma dimi aa: ‘Chɛhowa ke num Lutu, nduyɛ mbo wa wana kɛndɛ naa num chua. Suŋ suŋ niŋ, a nɔ po mamaa. Maa Chɛhowa hiou lachi a saŋgalaa sɔlaa.’