တၢ်မၤလိ ၃၃
နီၢ်ရူၤသးဒီးနီၢ်နၤဧမံ
ဖဲတၢ်သၣ်ဝံၤလီၤဒိအိၣ်ထီၣ်ဝဲလၢ ကီၢ်အံၣ်စရ့လးပူၤအခါ ပှၤအံၣ်စရ့လးဖိတဂၤလၢအမံၤမ့ၢ် နီၢ်နၤဧမံန့ၣ် လဲၤအိၣ်လၢကီၢ်မိၤအးအပူၤ ဃုာ်ဒီးအဝၤဒီးအဖိခွါခံဂၤလီၤ. လၢခံန့ၣ် နီၢ်နၤဧမံအဝၤသံဝဲလီၤ. အဖိခွါခံဂၤန့ၣ် ဟံးန့ၢ်အမါဒီးပှၤမိၤအးမုၣ်လၢအမံၤမ့ၢ် နီၢ်ရူၤသးဒီးနီၢ်ဧိးရပၤလီၤ. တယံာ်ဘၣ်ဒီး နီၢ်နၤဧမံအဖိခွါခံဂၤန့ၣ် သံဝဲလီၤ.
နီၢ်နၤဧမံ နၢ်ဟူဘၣ်ဝဲလၢ ကီၢ်အံၣ်စရ့လးအပူၤန့ၣ် တၢ်သၣ်ဝံၤလီၤဒိ ပတုာ်ဝဲလံအဃိ အဝဲဆၢတဲာ်လီၤအသးလၢ ကက့ၤကဒါက့ၤဆူအထံအကီၢ်လီၤ. နီၢ်ရူၤသးဒီးနီၢ်ဧိးရပၤက့ၤပိာ်ဝဲနီၢ်နၤဧမံအခံလီၤ. ဘၣ်ဆၣ် ဖဲအဝဲသ့ၣ်ဟးလၢကျဲအခါန့ၣ် နီၢ်နၤဧမံတဲဘၣ်အဝဲသ့ၣ်လၢ– ‘သုမ့ၢ်မါလၢအဂ့ၤလၢယဖိခွါအဖီခိၣ် ဒီးဒဲၣ်မုၣ်လၢအဂ့ၤလၢယဖီခိၣ်လီၤ. ယအဲၣ်ဒိးလၢသု ကဖျီသုသးလၢအသီတဘျီလီၤ. က့ၤဆူ သုဟံၣ်လၢ ကီၢ်မိၤအးမီၤ.’ အဝဲသ့ၣ်တဲဘၣ်နီၢ်နၤဧမံလၢ– ‘ပအဲၣ်နၤလီၤ. ပတအဲၣ်ဒိးပာ်တ့ၢ်နၤဘၣ်.’ နီၢ်နၤဧမံဆဲးတဲအဝဲသ့ၣ်လၢ က့ၤလၢသုဟံၣ်သုဃီသၢၣ်. လၢခံ နီၢ်ဧိးရပၤက့ၤဝဲဆူ အဟံၣ်လၢကီၢ်မိၤအးအပူၤလီၤ. မ့မ့ၢ်နီၢ်ရူၤသးန့ၣ် အိၣ်တ့ၢ်ဒီးနီၢ်နၤဧမံလီၤ. နီၢ်နၤဧမံတဲဘၣ်နီၢ်ရူၤသးလၢ– ‘နီၢ်ဧိးရပၤက့ၤကဒါက့ၤဝဲဆူ အပှၤကလုာ် ဒီးအကစၢ်ယွၤအအိၣ်လံ. က့ၤပိာ်အခံ ဒီးက့ၤလၢနမိၢ်အဟံၣ်နီၤ.’ ဘၣ်ဆၣ် နီၢ်ရူၤသးတဲဝဲလၢ– ‘ယတပာ်တ့ၢ်နၤဘၣ်. နပှၤကလုာ်န့ၣ် ကကဲထီၣ်ဝဲယပှၤကလုာ် ဒီးနကစၢ်ယွၤန့ၣ် ကကဲထီၣ်ယကစၢ်ယွၤလီၤ.’ ဖဲနီၢ်နၤဧမံနၢ်ဟူဘၣ်ဝဲ နီၢ်ရူၤသးအတၢ်ကတိၤအခါ အဝဲကသးခုဝဲထဲလဲၣ်.
နီၢ်ရူၤသးဒီးနီၢ်နၤဧမံ က့ၤတုၤဝဲလၢ ကီၢ်အံၣ်စရ့လးအပူၤန့ၣ် ဘၣ်ဖဲပှၤစးထီၣ်ကူးဝဲ ဘုမုယီၤအခါလီၤ. ဘၣ်တနံၤ နီၢ်ရူၤသးလဲၤထၢဝဲဘုစဲၤတဖၣ် လၢအအိၣ်လီၤတဲာ်လၢ စီၤဘိၤဧးအစံာ်ပျီပူၤန့ၣ်လီၤ. စီၤဘိၤဧးန့ၣ် မ့ၢ်ဝဲနီၢ်ရၤဃးအဖိခွါလီၤ. စီၤဘိၤဧးနၢ်ဟူဘၣ်ဝဲလၢ နီၢ်ရူၤသးန့ၣ် မ့ၢ်ပှၤမိၤအးမုၣ်ဖိလၢ အအိၣ်ဒီးတၢ်သးတီလၢ နီၢ်နၤဧမံအဖီခိၣ်လီၤ. လၢတၢ်န့ၣ်အဃိ စီၤဘိၤဧးတဲဘၣ်အခ့အပှၤလၢ ပာ်လီၤတဲာ်ဘုစဲၤလၢ စံာ်ပျီပူၤဒ်သိးနီၢ်ရူၤသး ကထၢထီၣ်ဝဲအဂီၢ်တက့ၢ်.
ဖဲဟါအဝဲန့ၣ် နီၢ်နၤဧမံသံကွၢ် နီၢ်ရူၤသးလၢ– ‘နလဲၤထၢထီၣ်ဘုစဲၤလၢ မတၤတဂၤအစံာ်ပျီပူၤလဲၣ်.’ နီၢ်ရူၤသးတဲဆၢက့ၤဝဲလၢ– ‘ယလဲၤထၢထီၣ်ဘုစဲၤလၢ စီၤဘိၤဧးအစံာ်ပျီပူၤလီၤ.’ ဝံၤဒီးနီၢ်နၤဧမံတဲဘၣ်နီၢ်ရူၤသးလၢ– ‘စီၤဘိၤဧးန့ၣ် မ့ၢ်ယဝၤအဘူးအတံၢ်တဂၤလီၤ. ဆဲးထၢထီၣ်ဘုစဲၤလၢ အစံာ်ပျီပူၤဃုာ်ဒီးပိာ်မုၣ်သးစၢ်လၢ အဂၤတဖၣ်တက့ၢ်. နမ့ၢ်ထၢထီၣ်ဘုစဲၤဖဲန့ၣ်န့ၣ် တၢ်ဘၣ်ယိၣ်တအိၣ်လၢနဂီၢ်ဘၣ်.’
နီၢ်ရူၤသးဆဲးထၢဝဲဘုစဲၤလၢ စီၤဘိၤဧးအစံာ်ပျီပူၤတုၤလၢ ပှၤကူးဘုမုယီၤဝံၤတစုလီၤ. စီၤဘိၤဧးထံၣ်ဘၣ်ဝဲလၢ နီၢ်ရူၤသးမ့ၢ်ပိာ်မုၣ်လၢအခုဒီး မ့ၢ်ပှၤလၢအဂ့ၤတဂၤလီၤ. ဖဲစိၤဝဲန့ၣ် ပိာ်ခွါတဂၤမ့ၢ်သံဝဲဖဲတချုးလၢ အဖိအိၣ်ဒံးဘၣ်အခါ အဘူးအတံၢ်တဂၤဂၤ ကဟံးန့ၢ်က့ၤ ပိာ်ခွါလၢအသံတဂၤအံၤ အမါန့ၣ်လီၤ. လၢတၢ်န့ၣ်အဃိ စီၤဘိၤဧးဟံးန့ၢ်ဝဲနီၢ်ရူၤသးလီၤ. လၢခံန့ၣ် အဝဲသ့ၣ်အိၣ်ဖျဲၣ်ထီၣ်ဝဲ အဖိတဂၤဒီးကိးန့ၢ်ဝဲအမံၤလၢ စီၤဧိၤဘ့းလီၤ. စီၤဧိၤဘ့းန့ၣ် မ့ၢ်ဝဲစီၤပၤဒၤဝံးအဖုလီၤ. နီၢ်နၤဧမံအသကိးတဖၣ် သးခုဃုာ်ဒီးအီၤလီၤ. ဒီးအဝဲသ့ၣ်တဲဘၣ် နီၢ်နၤဧမံလၢ– ‘အဆိကတၢၢ်န့ၣ် ယဟိဝၤယွၤဟ့ၣ်လီၤနၤ နီၢ်ရူၤသးဒီး အဝဲမ့ၢ်ပှၤလၢ အဂ့ၤလၢနဖီခိၣ်လီၤ. ခဲအံၤ နဒိးန့ၢ်ဘၣ် နလံၤခွါတဂၤလံ. မ်ယဟိဝၤယွၤ ဘၣ်တၢ်စံးထီၣ်ပတြၢၤအီၤတက့ၢ်.’
“တံၤသကိးတနီၤနီၤ မ့ၢ်ပှၤသးတီအါန့ၢ်ဒီပုၢ်ဝဲၢ်တဖၣ်တက့ၢ်လီၤ.”—ကတိၤဒိ ၁၈:၂၄, ခ့ခါစှီၤကျိာ်
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
နီၢ်ရူၤသး—“ပိာ်မုၣ်အဂ့ၤအဝါ”
ဘၣ်မနုၤအဃိ နီၢ်ရူၤသးဒီး စီၤဘိၤဧး အတၢ်ဆီဟံၣ်ဆီဃီန့ၣ် မ့ၢ်တၢ်လၢ အရ့ဒိၣ်လဲၣ်. ဘၣ်ဃးဒီးဟံၣ်ဖိဃီဖိန့ၣ် ပမၤလိန့ၢ်တၢ်လၢ နီၢ်ရူၤသးဒီးနီၢ်နၤဧမံ အအိၣ်သ့ဒ်လဲၣ်.
ကွၢ်လိမၤဒိးအဝဲသ့ၣ်အတၢ်နာ်
နီၢ်ရူၤသး—“ဖဲနလဲၤတၢ်ယကလဲၤယဲ”
ဘၣ်မနုၤအဃိနီၢ်ရူၤသး ပာ်တ့ၢ်ကွံာ်ဝဲအဟံၣ်ဖိဃီဖိဒီး အထံအကီၢ်လၢ တၢ်သူၣ်အိၣ်သးအိၣ်အပူၤကဲဝဲလဲၣ်. ယဟိဝၤယွၤ ပာ်လုၢ်ပာ်ပှ့ၤနီၢ်ရူၤသး ခီဖျိလၢ အဝဲအိၣ်ဒီးတၢ်ဂ့ၤတၢ်ဝါလၢ မနုၤတဖၣ်လဲၣ်.
