Apa za kere nzara zonene moIsraeli, Naomi namugara gwendi ntani vana vawo wovagara vavali kwa dirukilire kosirongo saMowaba. Konyima, mugara gwaNaomi ta fu. Vana vaNaomi kwa kwere vakadi woVamowaba, Rutu naOrupa. Ehudi, vana vaNaomi tava ya fu.

Apa ga zuvhire Naomi asi moIsraeli mwato nzara, ta tokora kutengura. Rutu naOrupa tava zi nage, nye monzira ta va tantere asi: ‘One kwa kere vakadi wovawa kovana vange ntani kwange. Nina hara ngomu kware hena. Tengureni komambo geni.’ Vakadi tava limburura asi: ‘Ose kwa ku hara. Kapi tuna hara kukusiga.’ Naomi ta va sininike va tengure. Makura Orupa ta tengura, ano Rutu ta kara. Naomi ta tantere Rutu asi: ‘Orupa kuna kutengura kekoro nokovakarunga veni. Nove tengura.’ Nye Rutu ta tanta asi: ‘Kapi nani ku siga. Vantu woge name vange ngava kara, ano Karunga goge name Karunga gwange nga kara.’ Ngapi ono kugazara ga lizuvhire Naomi apa Rutu ga mu tanterere nonkango odo?

Rutu naNaomi kwa ya sikire moIsraeli posiruwo sokuteza mahangu. Ezuva limwe, Rutu ta zi a ka toragure mahangu mepya lyaBowasa, ogu ga kere munwaRahabu. Age kwa zuvhire asi Rutu kwa kere Mumowaba ogu ga pakerere mbili Naomi. Ta tantere varugani vendi va sige mahangu gamwe mepya yipo Rutu a ga toragure.

Kongurova Naomi ta pura Rutu asi: ‘Mepya lyalye ono ka toragura  naina?’ Rutu ta limburura asi: ‘Mepya lyomugara gedina Bowasa.’ Naomi ta mu tantere asi: ‘Bowasa ekoro lyamugara gwange. Twikira kutoragura mepya lyendi novarugani vendi wovakadi. Kapi ngava kurugana yoyidona.’

Rutu kwa twikilire kurugana mepya lyaBowasa dogoro tava mana kuteza. Bowasa ga yi dimbwilire asi Rutu kurugana unene ntani nondunge. Posiruwo sina, nsene muntu ana fu nye kapi ga kara novanona, vekoro lyendi yiwo ngava kwara mukadendi. Eyi yiyo Bowasa ga kwarerere Rutu. Tava ya kara nomuna gomugara gedina Obedi, ogu ga ya kere ozinyakuru vahompa Ndafita. Vakaume vaNaomi kwa hefe. Tava tanta asi: ‘Jehova ga ku pa Rutu, ogu ga kupakera mbili, ano ngesi ono kara namutekuroge. Jehova va mu fumadeke.’