Vava mvengele wakota muna Isaele, nkento mosi wa mwisi Isaele nkumbu andi Naomi, wayenda zingila kuna Moabe kumosi yo nkaz’andi ye wan’au wole amakala. Kuna kwalanda, o nkaz’a Naomi wafwa. O wan’andi basompa akento a esi Moabe, Rutu yo Orepa. Diankenda vo kuna kwalanda, wan’a Naomi mpe bafwa.

Vava Naomi kawá vo mvengele kuna Isaele ufokokele, wabaka e nzengo za vutuka kuna nsi andi. Rutu yo Orepa bayenda yandi. Kansi muna nzila, Naomi wabavovesa vo: ‘Nu akento ambote nuakala kwa wan’ame, nu wan’ambote mpe kwa mono. Nzolele vo nuasompa akala akaka. Nuvutuka kweno kuna Moabe.’ Bamvutula vo: ‘Zola tutoma kuzolanga. Ke tuzolele kusisa ko.’ Kansi, Naomi wakwamanana kubavovesa vo bavutuka. I bosi, Orepa wavutuka kwandi, kansi o Rutu kazola vutuka ko. Naomi wamvovesa vo: ‘Orepa ovutukidi kwa nkangu eno ye kwa nzambi zeno. Ongeye mpe wenda kwaku.’ Kansi o Rutu wavova vo: ‘Kilendi kusisa ko. O nkangu aku ukala nkangu ame, o Nzambi aku okala se Nzambi ame.’ Aweyi obenze kamona o Naomi vava kawá e mvovo miami mia Rutu?

Rutu yo Naomi balwaka kuna Isaele kuna lubantiku lwa nkutik’a masa. Lumbu kimosi, Rutu wayenda wonzolola e mbongo yasala muna mpatu a Boaze wa mwan’a Rakabi. Boaze Wawá e nsangu vo Rutu i mwisi Moabe ona watatidila Naomi.  Wazayisa asadi andi vo basisa ndambu a masa muna mpatu kimana Rutu keza wonzolola.

Muna masika, Naomi wayuvula Rutu vo: ‘Mu mpatu a nani osadidi o unu?’ Rutu wavutula vo: ‘Mu mpatu a yakala dimosi una ye nkumbu a Boaze.’ Naomi wamvovesa vo: ‘Boaze yitu kia nkaz’ame. Kwamanana sadila muna mpatu andi ye ndumba zankaka. Ke bekuvanga diambu ko.’

Rutu wakwamanana sadila muna mpatu a Boaze yavana e nsungi a nkutika yafokoka. Boaze wamona vo Rutu nkwa fululu ye nkento ambote kakala. Muna tandu kiakina, avo yakala ofwidi lembi sisa wana, yitu kiandi osompa nkento kasisidi. Muna kuma kiaki, Boaze wasompa Rutu. Bawuta mwana yo kumvana e nkumbu a Obede, ona wawuta se dia Davidi wa ntinu. Akundi a Naomi bayangalala kikilu. Bavova vo: ‘Entete, Yave wavana Rutu ona otoma kuzolanga, owau uvene o ntekelo. Yambula Yave kakembelwa.’