Iˉsaˍreˍlaˆ mvuhˇ miˬ hkʼaw meuꞈ lonˉ kaˆ lonˉ gaˬ la htaˇ, Nawˉmiꞈ meh ve yaˇ miˇ teˇ gʼaˇ yawˇ ve awˬ hpawˇ leh yaˇ 2 gʼaˇ Mawˇbaˆ mvuhˇ miˬ lo hpaw˗e ve yoˬ. Maˇ maw gaˬ leh Nawˉmiꞈ ve awˬ hpawˇ suh˗e ve yoˬ. Yawˇ ve yaˇ paˍ 2 gʼaˇ Mawˇbaˆ chaw yaˇ miˇ Ruˉhtaˆ leh Awˇraˍpaˆ htaꞈ heuˆ ve yoˬ. Hkʼe te leh, Nawˉmiꞈ ve yaˇ paˍ 2 gʼaˇ kaꞈ suh˗e leh yawˇ nyi ma luˬ jaˇ.

Iˉsaˍreˍlaˆ mvuhˇ miˬ hkʼaw meuꞈ lonˉ kaˆ lonˉ maˇ cawˬ tehꞈ Nawˉmiꞈ gʼa kaˇ htaˇ, yawˇ dawˇ cheˆ leh kʼoꞈ˗e ve yoˬ. Ruˉhtaˆ leh Awˇraˍpaˆ kaꞈ kʼai ve yoˬ. Yaꞈ hkʼaˇ, yaꞈ kʼaw kʼaˉ lo gaˬ leh Nawˉmiꞈ yawˇ awˬ hkuiˇ ma htaꞈ kʼoˆ piˇ ve, ‘nawˬ huiˉ maˬ ngaˬ yaˇ paˍ ve daꞈ ve awˬ miˇ ma leh daꞈ ve awˬ hkuiˇ ma hpehꞈ ve yoˬ. Nawˬ huiˉ maˬ htaꞈ awˬ hpawˇ awˬ suhˉ kʼawꞈ heuˆ tcuh gaˇ leh Mawˇbaˆ mvuhˇ miˬ lo kʼoꞈ˗e loˬ.’ Yawˇ huiˉ maˬ kʼoˆ piˇ ve, ‘ngaˬ hui nawˬ htaꞈ haꞈ leh nawˬ geh kʼai gaˇ ve yoˬ.’ Yaꞈ hkʼaˇ, kʼoꞈ˗e loˬ tehꞈ Nawˉmiꞈ kʼawꞈ kʼoˆ piˇ ve yoˬ. Awˬ leh meuˇ htaˇ Awˇraˍpaˆ kʼoꞈ˗e ve yoˬ. Yaꞈ hkʼaˇ, Ruˉhtaˆ maˇ kʼoꞈ˗e. Nawˉmiꞈ yawˇ htaꞈ kʼoˆ piˇ ve, ‘Awˇraˍpaˆ lehˬ yawˇ ve chaw leh yawˇ ve gʼuiˬ sha geh kʼoꞈ˗e peuˬ. Nawˬ kaꞈ kʼoꞈ˗e loˬ.’ Yaꞈ hkʼaˇ, Ruˉhtaˆ kʼoˆ ve, ‘ngaˬ nawˬ htaꞈ baˬ taˉ tuˬ ve maˇ heˆ. Nawˬ ve chaw ceuˬ ngaˬ ve chaw ceuˬ hpehꞈ leh nawˬ ve Gʼuiˬ sha htawˇ ngaˬ ve Gʼuiˬ sha hpehꞈ ve yoˬ.’ Nawˬ dawˇ kʼo, Ruˉhtaˆ chi hkʼe kʼoˆ ve htaꞈ gʼa kaˇ htaˇ, Nawˉmiꞈ hkʼaˬ hkʼe dawˇ ve le?

Ruˉhtaˆ leh Nawˉmiꞈ Iˉsaˍreˍlaˆ mvuhˇ miˬ lo gaˬ la htaˇ, caˬ gʼeuꞈ ve awˬ yanˇ cawˇ ve yoˬ. Teˇ nyi htaˇ Ruˉhtaˆ lehˬ Raˍhaˆ ve yaˇ paˍ Bawˇzaˆ ve ti mi hkʼaw caˬ nu sheˆ taˍ ve htaꞈ ca gʼawˆ yuˬ ve yoˬ. Bawˇzaˆ lehˬ Ruˉhtaˆ Mawˇbaˆ chaw hpehꞈ leh Nawˉmiꞈ htaꞈ hkʼa dehꞈ nyi haꞈ shaˉ piˇ ve awˬ lawn gʼa kaˇ ve yoˬ. Bawˇzaˆ geh kanˉ te la ve chaw htaꞈ yawˇ kʼoˆ piˇ ve, Ruˉhtaˆ caˬ nu sheˆ taˍ ve htaꞈ gʼawˆ tuˬ, caˬ kʼaꞈ hkʼaw ve caˬ nu gʼawˬ tawˆ piˇ˗oˆ.

 Mvuhˇ hpeuꞈ la htaˇ Nawˉmiꞈ Ruˉhtaˆ htaꞈ na piˇ ve, ‘yaꞈ nyi nawˬ a shu ve ti mi hkʼaw caˬ nu caˬ gʼawˆ ve le?’ Ruˉhtaˆ hkʼawꞈ piˇ ve, ‘Bawˇzaˆ meh ve ti mi hkʼaw gʼawˆ yuˬ ve yoˬ.’ Nawˉmiꞈ yawˇ htaꞈ kʼoˆ piˇ ve, ‘Bawˇzaˆ lehˬ ngaˬ awˬ hpawˇ ve awˬ viˉ awˬ nyi cawˇ ve yoˬ. Nawˬ yawˇ ve ti mi hkʼaw caˬ nu caˉ leh gʼawˆ yuˬ˗oꞈ. Kanˉ te chehˇ ve yaˇ miˇ geh nawˬ chehˇ ve kʼo, kawˆ tuˬ maˇ cawˬ.’

Caˬ gʼeuꞈ peuˬ htaˇ hkʼa gaˬ Ruˉhtaˆ Bawˇzaˆ ve ti mi hkʼaw caˬ nu gʼawˆ yuˬ ve yoˬ. Ruˉhtaˆ kanˉ te kaiˬ leh daꞈ ve yaˇ miˇ hpehꞈ ve tehꞈ Bawˇzaˆ gʼa mawˬ ve yoˬ. Oˇ htaˇ teˇ co˗e hawˉ hkʼaˆ hkʼaˬ ve teˇ gʼaˇ maˇ kʼoˆ, yaˇ paˍ maˇ cawˬ taˉ leh suh˗e ve kʼo, awˬ viˉ awˬ nyi teˇ gʼaˇ yawˇ ve awˬ miˇ ma htaꞈ gʼa heuˆ ve yoˬ. Bawˇzaˆ Ruˉhtaˆ htaꞈ heuˆ leh yaˇ paˍ Awˇbehˆ meh ve teˇ gʼaˇ paw la ve yoˬ. Yawˇ lehˬ Daˍviˆ ve awˬ puˍ hpehꞈ ve yoˬ. Nawˉmiꞈ ve awˬ chawˇ teˇ hpaˍ yawˇ geh gʼa ga ha lehˬ la ve yoˬ. Yawˇ hui kʼoˆ ve, ‘Yaˬhoˉvaˬ nawˬ htaꞈ Ruˉhtaˆ peꞈ laˇ leh yawˇ nawˬ htaꞈ te laˇ ve daꞈ jaˇ. Chi teˇ hkui nawˬ awˬ hawehˍ paˍ kaꞈ gʼa peuˬ. Yaˬhoˉvaˬ htaꞈ chiˇ mvuh piˇ˗oˆ.’