Ka nako yene kunani hahulu tala mwa Isilaele, Muisilaele yabizwa Naomi atutela kwa naha ya Moabi ni muunaa hae hamohocwalo ni bana babona babashimani bababeli. Hamulaho wa nako, muunaa Naomi atimela. Bana bahae banyala Ruti ni Olipa, ili bane bali Mamoabi. Ka bumai, hamulaho wa nako, bana ba Naomi bashwa.

Naomi hanaautwile kuli lukupwe lufelile mwa Isilaele, aikatulela kukutela habo yena. Ruti ni Olipa baya ni yena, kono hane bali mwa nzila, Naomi ali ku bona: ‘Nemuli basali babande kwa bana baka mi ni ku na nemuli bana babande. Nibata kuli kaufelaa mina munyalwe hape. Hamukutele habo mina kwa Moabi.’ Basali bao kihaa bali: ‘Lwakulata! Halulati kukusiya.’ Naomi azwelapili kubataluseza kuli bakute. Kwa mafelelezo, Olipa akuta kono Ruti yena ahana. Naomi ali ku Ruti: ‘Olipa ukutezi kwa sicaba sahabo yena ni kwa milimu yahae. Hakukute hamoho ni yena, mi uyo pila ni bo maho.’ Kono Ruti ali: ‘Hanina kukusiya. Sicaba sahao ikaba sicaba saka, mi Mulimu wahao, ikaba Mulimu waka.’ Munahana kuli Naomi naaikutwile cwañi Ruti hanaabulezi manzwi ao?

Ruti ni Naomi bafita mwa Isilaele kwa makalelo a kutulo ya mabele. Zazi leliñwi, Ruti aya kuyo bubula mwa simu ya muuna yabizwa Boazi, yanaali mwanaa Rahaba. Boazi naautwile kuli Ruti neli Mumoabi ili yanaabonisize busepahali ka kuzwelapili kuina ni Naomi. Mi abulelela babeleki bahae kuli basiye bubeke bobuñwi mwa simu kuli Ruti abubule mwateñi.

 Manzibwana ao, Naomi abuza Ruti kuli: ‘Neuzo sebeleza mwa simu ya mañi kacenu?’ Ruti aalaba kuli: ‘Nenisebeleza mwa simu ya muuna yabizwa Boazi.’ Naomi kihaa li ku yena: ‘Boazi ki wahabo muunaaka. Uzwelepili kubeleka mwa simu yahae ni basizana babañwi. Hakuna yaka kueza maswe.’

Ruti azwelapili kubeleka mwa simu ya Boazi kufitela kutulo ifela. Boazi alemuha kuli Ruti naasebeza ka taata mi naali musali yomunde. Mwa mazazi ao, haiba muuna ashwa asina bana, wahabo muuna naaka nyala mbelwa yo. Kacwalo, Boazi anyala Ruti. Baba ni mwana yanaabizwa Obedi, ili yo hasamulaho naabile kukwaa Mulena Davida wamuuna. Balikani ba Naomi nebatabile. Kiha bali: ‘Sapili, Jehova naakufile Ruti, ili yasazwelapili kukulata, mi ka nako ya cwale unani muikulu. Haike Jehova alumbekwe.’