Omu zala yakalombolombo yengilile mulifuchi lyaIsalele, kaIsalele wapwevo walijina lyaNowemi ayile nakutwama kuMowave nalunga lyenyi hamwe navana vavo vamalunga vavali. Kutwala muze, lunga lyenyi afwile. Mukuhita chalwola, vaze vana vambachile mapwevo javo vaze vapwile vaMowave, majina avo apwile Lute naOlopa. Chaluvinda, vana vaNowemi vamalunga vafwile.

Omu Nowemi evwile ngwavo zala yakalombolombo yinakumu muIsalele, akindulukile kwimbo lyenyi. Shikaho, Lute naOlopa vayile nanayewenu hamwe. Oloze omu vapwile nakuya mujila, Nowemi avalwezele ngwenyi: ‘Enu mwapwile mumapwevo vamwaza kuli vana vami vamalunga, kaha muvamawenu jami vamwaza. Shikaho, ngunakusaka muvosena mukasomboke cheka. Kindulukenu kuMowave.’ Kaha vakiko vambile kuli ikiye ngwavo: ‘Twakuzanga chikuma, kaha katwasakile kukusezako.’ Nowemi avalembelelele lika ngwenyi vakinduluke. Kutwala muze, Olopa akindulukile oloze Lute kakindulukileko. Ngocho Nowemi ambile kuli Lute ngwenyi: ‘Tala Olopa nakinduluka kuvatu jenu nakutulunga twenu. Shikaho yako nenyi.’ Oloze Lute ambile ngwenyi: ‘Kangweshi kukusezako. Vatu jove navakapwanga vatu jami, kaha Kalunga kove mwakapwanga Kalunga kami.’ Uno unashinganyeka ngwove Nowemi evwile ngachilihi omu Lute ahanjikile mazu kana?

Lute naNowemi vahetele muIsalele kumaputukilo angonde yakwaha mbale. Likumbi limwe Lute ayile nakuhuhwojola kumande alunga umwe walijina lyaMbowaze, uze apwile mwanaLahave. Omu Mbowaze evwile ngwavo Lute apwile kaMowave uze ashishikile kuli Nowemi, alwezele vaka-kumuzachila ngwenyi vasezengamo manona amavulu mangana Lute akungulule.

 Likumbi vene lize naufuku, Nowemi ahulishile Lute ngwenyi: ‘Lelo unazachila muwande weya?’ Lute ambile ngwenyi: ‘Ngwayanga nakuzachila muwande waMbowaze.’ Kaha Nowemi amulwezele ngwenyi: ‘Mbowaze apwa kausoko kalunga lyami. Twalaho lika kuzachila muwande wenyi hohamwe navakwenu mapwevo, mwomwo mupwanga wakukingiwa.’

Lute atwalileho lika kuzachila muwande waMbowaze palanga nomu ngonde yakwaha yakumine. Mbowaze amwenenga Lute omu azachilenga nangolo kaha apwile nyamalikita. Mumakumbi kana, kachi nge lunga nafu chakuzeneka vana vamalunga, kaha uze tuliwe asombokelenga kuli kausoko kaLunga lyenyi. Shikaho Mbowaze ambachile Lute. Kutwala muze, vasemene mwana walunga kaha vamulukile ngwavo Ovete, uze ejile nakupwa kaka yaMwangana Ndavichi. Masepa jaNowemi vawahililile chikuma. Ngocho vambile ngwavo: ‘Chatete Yehova akuhanyine Lute, uze nashishikanga kuli ove, kaha unapu jino namuzukulu. Vamwalisenga Yehova.’