Lino umu Izlaeli mwali cipowe, umwanaci Umwina Izlaeli uwi zina ilyakuti Naomi yakukiile uku mpanga iya Moabu pamwi na iya na ana yakwe yaili. Lino papisile insita, iya wakwe Naomi wafwile. Ana yakwe yaatwazile anaci Aina Moabu, Luti na Olipa. Nomba icifile icakuti, lino papisile insita, ana yakwe Naomi nayo kwene yaafwile.

Lino Naomi uvwile ukuti icipowe icisila, waswilile uku Izlaeli. Luti na Olipa, yaapisile nawe, nomba lino yaali umu nzila, Naomi wayaneenyile ukuti: ‘Mwali mwemwe aci aasuma uku yana yane nupya ya manguvyala aasuma. Nkulonda ukuti mukatwalwe nupya. Fwandi swililini uku mwinu ku Moabu.’ Anaci yaa Yalanzile iyati: ‘Twamutemwa. Tusikulonda ukumusya.’ Naomi watwalilile ukuyaneena ukuti pitangini. Lyene Olipa waswilile, lelo Luti wene wakanyile. Naomi wamuneenyile ati: ‘Olipa wataswilila uku yantu yakwe na kuli ya leza yakwe. Pitanga pamwi nawe.’ Lelo Luti watile: ‘Ntalamusya. Antu inu yalaya antu yane, na Leza winu alaya a Leza wane.’ Uzye ukwelenganya ukuti Naomi uvwile uli lino Luti walanzile amazwi yaa?

Luti na Naomi yafisile umu Izlaeli pa nsita ino yazombolanga baale. Wanda umwi, Luti waile mu kutolelezya ingano izyasyalanga mu calo cakwe Boasi , uwali umwana wakwe Laabu. Boasi uvwile ukuti Luti umwina Moabu wali na ucisinka kuli Naomi. Wanenyile aomvi yakwe ukuti yaasya ingano zimwi umu calo pakuti Luti aatolelezya.

 Uwanda kwene uwa manguzi, Naomi uzizye Luti ati: ‘Uzye ilelo iwaomba uku calo cakwe weni?’ Luti walanzile ati: ‘U ku calo ca monsi uwi zina lyakuti Boasi.’ Naomi walanzile ati: ‘Boasi a lupwa wakwe iya wane. Twalilila ukuomba umu calo cakwe pamwi na anaci yauze. Pano kuuku kwene ulacingililwa.’

Luti watwalilile ukuomba umu calo cakwe Boasi kufikila lino yamazile ukuzombola. Boasi waweni ukuti Luti waombesyanga nupya wali umwanaci umusuma. Mu manda yaya, ndi cakuti umonsi wafwa ukwaula ukukwata umwana umonsi, lupwa uwa monsi uwatafwa wali nu kutwala umwanaci wiyo. Fwandi Boasi watwazile Luti. Yakweti umwana uwi zina lyakuti Obedi, wino pa cisila wizile aya isikulu wa Mwene Davidi. Auze yakwe Naomi yaatemilwe sana. Yalanzile iyati: ‘Yeova watandikilepo ukukupeela Luti, uwaya ningo sana kuli wewe, nupya paa wakupeela umwizikulu. Si Yeova alumbanyiziwe.’