Seki xiujmej onkaya mayan ompa Israel. Yejua ika, se siuat akin monotsaya Noemí mokaltalito Moab iuan inamik uan ome itelpochuan. Satepan, inamik Noemí momikilij. Itelpochuan monamiktijkej iniuan ome siuamej kayomej Moab: Rut uan Orpá. Sayoj ke, tetayokoltij porin satepan ikoneuan Noemí no momikilijkej.

Keman Noemí kitekakilij ke amo onkayaok mayan ompa Israel, kinemilij mokepas ixolal. Rut uan Orpá iuan yajkej, sayoj ke itech ojti Noemí kiniluij: “Namejuan nankatkaj kuali nantesiuauan uan kuali nantesiuamouan. Nikuelitaskia oksepa ximonamiktikan. Ximokepakan nanmochan ompa Moab”. Siuamej kinankilijkej: “Timitsteltasojtaj, amo tiknekij timitskauaskej moselti”. Noemí kisentokaya kiniluiaya maj mokepanij. Satepan, Orpá yajki, sayoj ke Rut mokauak. Noemí kiluij Rut: “Orpá mokepak ixolal uan oksepa kinueyichiuato itiotsitsin. Xiyouj iuan uan ximokepa ichan momomaj”. Sayoj ke Rut kiluij: “Amo nimitskauas. Moxolal yeski noxolal, uan moDios yeski noDios”. ¿Keniuj tiknemilia ke momachilij Noemí keman Rut kiluij nejon?

Rut uan Noemí ajsikej Israel keman peuaya motekia cebada. Se tonal, Rut kiololoto tatet tein mokaujtiyaya itech italpan Boaz, akin katka ikoneuj Rahab. Boaz kitekakilijka ke Rut katka se siuat kayot Moab akin semi kitasojtaya Noemí uan amo kinekik kikauas. Yejua kiniluij itekitikauan maj kikauanij okachi tatet uan ijkon Rut kiololoskia.

 Nejon youak, Noemí kitajtanij Rut: “¿Akoni italpan titekitik axkan?”. Rut kinankilij: “Italpan Boaz”. Noemí kiluij: “Boaz se ichankauj nonamik. Xiksentoka xitekiti italpan iniuan okseki ichpochmej. Ompa kuali tiyetos”.

Rut kisentokak tekitik italpan Boaz hasta keman kitamitekkej tatet. Boaz kiitak ke Rut katka se tel kuali siuat uan tel tekitikej. Itech nejon tonalmej, komo se takat momikiliaya uan amo kinpiaya konemej, se ichankauj uelia monamiktiaya iuan akin katka isiuauj. Yejua ika Boaz monamiktij iuan Rut. Kipiakej se konetsin uan kitokaytijkej Obed. Xiujmej satepan, Obed mochiuak iueyitat tekiuaj David. Itasojikniuan Noemí tel yolpakiaj. Kiluiayaj: “Yekinika, Jiova mitsmakak Rut, akin tel kualtakat mouan. Uan axkan tikpia se moixuiuj. Yejua ika, maj tikueyitalikan Jiova”.