Seki kauitl otlaapistik altepetl Israel. Ik non, se siuatl israelita tlen omotokayotiaya Noemí, inamik uan ome ikoneuan ochantitoj altepetl Moab. Satepan, inamik Noemí omikik. Ikoneuan omonamiktijkej iuan ome siuamej moabitas. Se omotokayotiaya Rut uan okse Orpá. Pero satepan omikej ome ikoneuan Noemí.

Noemí omokuepki Israel ijkuak okimatki ayakmo okatka apistli. Rut uan Orpá iuan oyajkej, pero itech ojtli Noemí okinmilui: “Namejuan kuali namoyelis. Nechpaktiskia oksepa ximonamiktikan. Ximokuepakan namokalijtik itech Moab”. Yejuan okinankilijkej: “Sapanoa timitstlasojtlaj uan amo tiknekij timitskajteuaskej moselti”. Noemí ok okinmiluiaya ma mokuepakan inkalijtik. Saiktlami, Orpá oyajki pero Rut omoka. Noemí okilui Rut: “Orpá omokuepki ialtepe kanin katej idioses. Uan xio ikalijtik monantsin”. Pero Rut okilui: “Amo nimitskauas. Moaltepe yetos noaltepe uan moDios yetos noDios”. ¿Ken timokuayejyekoa omomachili Noemí ijkuak ijkon okilui Rut?

Rut uan Noemí oajsitoj Israel ijkuak opejkej kipixkaj cebada. Se tonal, Rut okololoto cebada tlen omoka itlala Boaz, inantsin Boaz okatka Rahab. Boaz okimatki Rut okatka moabita uan amo okika iselti Noemí. Boaz okinmilui itekipanojkauan okachi ma kikajtiakan cebada itlala uan ijkon Rut uelis kololoskia.

 Non yoak, Noemí okitlajtlani Rut: “¿Axkan kanin otimotijtixito?”. Rut okinankili: “Itlala Boaz”. Noemí okilui: “Ye ikalchanejka nonamik. Ompa xitekitito inmiuan oksekimej ichpokamej. Ompa kuali tiyetos”.

Rut otekitik itlala Boaz hasta ijkuak otlankej opixkakej. Boaz okitak Rut okatka yolkuali uan okipaktiaya tekitis. Itech nonmej tonalmej, tla se tlakatl omikiaya uan amo keman okinpixki ikoneuan, se ikalchanejka uelis monamiktiskia iuan isiua. Ik non, Boaz omonamikti iuan Rut. Okipixkej inkone uan okitokayotijkej Obed. Miak xiuitl satepan, Obed omochi ikojkol ueyi tekiua David. Iyolikniuan Noemí sapanoa oyolpakej. Okiluiayaj: “Achto, Jehová omitsmakak Rut akin sapanoa mitstlasojtla. Uan axkan tikpia moxui, ik non, ma tikueyichiuakan Jehová”.