Mu mukuvo wo njara mu Iziraeri, umwe muIziraeri waidanwa Naomi wakathuta kwenda ku nyika yo Maobhi pamwepo no mwamuna wake no vana vake vaviri. Mu kufamba ko nguva mwamuna wa Naomi wakafa. Vana vake vakacadha na Rute zve na Orpa, vaMoabhi. Zvinosuruvarisa ngo zvokuti, mu kufamba ko nguva, vana va Naomi vakafa.

Naomi paakazwa kuti njara mu Iziraeri yainga yapera, iyena wakatema civaringo co kuhwirira ku muzi. Rute na Naomi vakaita hwendo pamwepo, asi povainga vari mu gwanja, Naomi wakavabvunja kuti: ‘Imwimwi makava vakaji vaushoni ku vana vangu zve nyamwana jakanaka kwandiri. Ndinoda kuti murovohwezve ngo papsa. Endanyi ku muzi kwenyu ku Moabhi.’ Vanakaji vakati: ‘Tinomuda maningi! Atidi kumusia.’ Naomi wakaramba ecivabvunja kuti vahwirire. Pakugumisira, Orpa wakahwirira, asi Rute wakaramba. Naomi wakamubvunja kudari: ‘Orpa wahwirira ku vandhu vake zve ku zvimwari zvake. Endai pamwepo naye.’ Asi Rute wakati: ‘Andizomusii. Vandhu venyu vanozova vandhu vangu zve Mwari wenyu anozova Mwari wangu.’ Unorangarira kuti Naomi wakazwa kudini Rute paakamubvunja izvo?

Rute na Naomi vakaguma ku Iziraeri mu mukuvo wo kukotora. Pa njiku imweni, Rute wakaenda koobojera zvakasarira mu minda wo mwanarume umweni waidanwa Bhoazi. Iyena wakazwa kuti Rute wainga wo ku Moabhi uwo wakaramba wakagondeka ka Naomi. Iyena wakabvunja vashandi vake kuti vasie padoko zvovaikotora kuti Rute abojere.

 Pa usiku umweni, Naomi wakabvunja Rute kudari: ‘Washanda mu minda waani nyamasi?’ Rute wakati: ‘Minda wainga wo mwanarume waizwi Bhoazi.’ Naomi wakamubvunja kudari: ‘Bhoazi ndi umwe wo pa ukama hwo mwamuna wangu. Rambai ucishanda mu minda wake pamwepo no varandakaji vake. Unova wakangwaririka kondhoyo.’

Rute wakaramba acishanda mu minda wa Bhoazi mbhera kukotora kwapera. Bhoazi wakavona kuti Rute waishanda ngo simba zve wainga mwanakaji wakanaka. Mu njiku jiya mwanarume akafa zve pa muzipo apacinazve mwana worume, wo pa ukama hwake waizocadha no noni iya. Ngo kudaro Bhoazi wakacadha na Rute. Ivona vakava no mwana vomudanija Obhedhi, uwo mu kufamba ko nguva wakava cekuru wa Mambo Dhavhidhi. Shamwari ja Naomi jakadakara maningi. Ivona vakati: ‘Pakutanga, Jehovha wakakupa Rute, uwo wakakuitira zvaushoni zve wari wakupa muzukuru. Jehovha ngaakujwe.’