Ijkuak onkatka apistli ipan Israel, se israelita itoka katka Noemí onochanpatlak Moab. Oyaj iuan iueuentsin niman omemej ikoneuan. Sakin iueuentsin omik. Ikoneuan ononamiktijkej, se iuan Rut niman okse iuan Orpá. Yejuamej moabitas katkaj. San ika, teyolkoko ika ikoneuan Noemí, omijkej.

Ijkuak Noemí okikak ika ipan Israel xok onkatka apistli, okinemili nokuepas. Rut niman Orpá iuan oyajkej, san ika, ipan ojtli Noemí okimijli: “Nemejuamej nenkatkaj melak kuajli nentesiuauan niman nentesiuamonuan. Nikuelitaskia oksejpa xmonamiktikan. Xmokuepakan nemochan Moab”. Siuamej okijtokej: “¡Timitstlasojtlaj! Xtiknekij timitskaujteuaskej”. Noemí miyekpa okimijli manokuepakan. Sakin, Orpá oyaj, san ika, Rut onokauj. Noemí okijli: “Orpá inokueptok ikalpan niman itech itajtsitsinuan. Iuan xuiya niman xkitati monan”. San ika, Rut okijli: “Xnimitskauas. Mokalpan, nokalpan yes niman moTajtsin, noTajtsin yes”. ¿Kenon tiknemilia onomachili Noemí ijkuak Rut okijli yejon?

Rut niman Noemí oajsikej Israel ijkuak peua nopixka cebada. Se tonajli, Rut okipejpenato cebada tlen onokauj ipan itlal se akin itoka katka Boaz, ikoneuj Rahab. Boaz okikak ika Rut moabita katka niman ika xokitlalkaui Noemí. Yejua okimijli itlakeualuan makikauakan seki cebada tlen Rut ueliskia kipixkaskia.

 Ijkuak itlapoyaujtoya, Noemí okitlajtolti Rut: “¿Itech akinon itlal otitekit aman?”. Rut okinankili: “Ipan itlal Boaz”. Noemí okijli: “Boaz se ichanejkauj noueuentsin. Xtekiti ipan itlal imiuan okseki ichpokamej. Ompa xtlaj mopan nochiuas”.

Rut otekit ipan itlal Boaz hasta ijkuak otlan ika pixkalo. Boaz okitak ika Rut melak tekitki niman katka se kuajli siuatl. Ipan yejon tonaltin, tla se tlakatl mikiya niman xkipiaya ikoneuan, se ichanejkauj ueliya nonamiktiaya iuan siuakaualtsintli. Ijkon Boaz ononamikti iuan Rut. Okipixkej se inkoneuj, okitokayotijkej Obed, yejua onochiuj iabuelo tekiuaj David. Akin imiuan nouikaya Noemí melak pakiyaj niman okijtokej: “Kachtopa, Jehová omitsmakak Rut, akin melak mitstlasojtla niman aman tikpiya se moxuiuj. Matikueyichiuakan Jehová ipampa yejon”.