Ízreldi hodííchįįdgo, Neiyómii, asdzą́ą́ Ízrel dineʼé nilı̨́įgo, bichʼooní dóó biyáázhké yił Móʼab kéyahgóó dashdiiná. Tʼahádóó Neiyómii bichʼooní daaztsą́. Hayáázh tʼáá áłah éí Móʼab dineʼé sáanii Ruth dóó Órpah wolyéego yá azyeh. Tʼahádóó Neiyómii biyáázh tʼáá áłah neezná, áko yíníiłgo hooʼaʼ.

Ízreldi doo hodichingóó baa hozhdiiztsʼą́ąʼgo Neiyómii éí ákǫ́ǫ́ nídeeshdááł jiniizı̨́ı̨́ʼ. Ruth dóó Órpah bił atiingóó jookahgo ábijiní: ‘Shiyáázh yáʼátʼéehgo bichʼooní nohłı̨́ı̨́ ńtʼééʼ áádóó yáʼátʼéehgo shizhááʼáád nohłı̨́ı̨́ ńtʼééʼ. Nílááh nihikéyahgóó nídóhtʼash, áadi nihichʼooní nááhodoodleeł.ʼ Tʼáá áłah áháłní: Ayóóʼánííníiʼní áádóó doo nitsʼádiitʼash da.ʼ Ákótʼée ndi, nílááh nááhtʼash bizhdííniid. Órpah éí dah nídiidzá, ndi Ruth éí tʼáá hwíighah yigááł. Neiyómii áháłní: ‘Órpah éí bidineʼé dóó bidiyin yichʼįʼ dah nídiidzá. Nílááh, bił náátʼash.ʼ Ákótʼée ndi Ruth ání: ‘Doo nitsʼádeesháał da, nidineʼé éí shidineʼé doo, niDiyin ałdóʼ shiDiyin doo.ʼ Ruth kódííniidgo, Neiyómii éí haitʼéego baa tsízdeezkééz?

Ruth dóó Neiyómii éí Ízreldi tłʼoh naadą́ą́ʼ dahagéeshgo dóó bedaʼatłʼohgo baa naʼaldeehgo áadi níjítʼáázh. Réíhab biyáázh Bóʼaz wolyéego bidáʼákʼehgi tłʼoh dabííʼohígíí Ruth baa nahozhdida. Bóʼaz éí Ruth Móʼabdę́ę́ʼ naagháago Neiyómii doo  yitsʼághááhgóó yił sikéego baa hozdiiztsʼą́ą́ʼ. Bóʼaz bá ndaalnishígíí éí tłʼoh dabííʼohígíí Ruth łaʼ tʼáá bá naazhjoolgo ádadoołííł yidííniid.

Iʼííʼą́ągo Neiyómii éí Ruth nabízhdééłkid: ‘Háísh bidáʼákʼehgi nishínílnish?ʼ Ruth ání: ‘Hastiin léiʼ Bóʼaz wolyéego.’ Neiyómii ání: ‘Éí shichʼooní yę́ę bikʼéí jílı̨́. Bóʼaz bidáʼákʼehgi chʼikę́ę́h bił nidanilnish. Ákweʼé atah naa áháyą́ą doo.ʼ

Ruth éí dáʼákʼehgi ayóó nijilnishgo dóó asdzání yáʼátʼéehii jílı̨́įgo Bóʼaz haa ákoniizı̨́ı̨́ʼ. Íídą́ą́ʼ diné biyeʼ tʼahdoo haleehgóó daatsaahgo, hweʼasdzą́ą́ yę́ę hakʼéí łaʼ beʼasdzą́ą́ dooleeł. Éí bikʼehgo Bóʼaz éí Ruth jizyeh áádóó hayeʼ hazlı̨́ı̨́ʼ. Éí Óbed bee jíízhiʼ. Óbed éí náasdi Naatʼáanii David binálí jizlı̨́ı̨́ʼ. Neiyómii bikʼis ádabiłní: ‘Jiihóvah éí Ruth néiníłtı̨́įgo naa áháyą́ą́ ńtʼééʼ, kʼad éí ninálí hazlı̨́ı̨́ʼ. Jiihóvah baa haʼniih leʼ.ʼ