Etyi ko Isilayeli kuakala ondyala, omukai umwe utiwa Noemi ailukila ko tyilongo tyo Moabe nomulume wae novana vae vevali. Konyima, omulume wa Noemi ankhi. Ovana vae vevali avanepe ovakai vo ko Moabe, Rute na Orpa. Pakala vala katutu, ovana va Noemi navo avankhi.

Etyi Noemi etyiiva okuti ko Isilayeli kutupu vali ondyala, atokola okukondoka kotyilongo tyae. Avaende na Ruti na Orpa. Mahi mokueenda kuoungendi, Noemi evepopila okuti: ‘Muakalele ovanthu ovawa naame novana vange, ame nahanda munepwe vali. Kondokei ko Moabe.’ Avemutolela okuti: ‘Onthue tukuhole! Onthue kamatukuyeke.’ Noemi atolela Orpa na Ruti okuti kondokei. Orpa akondoka, mahi Ruti esala nae. Noemi emupopila okuti: ‘Orpa ukahi nokukondoka kovanthu vae noko vikahuku viae. Kondoka nae kovonyoko keumbo lienyi.’ Mahi Ruti apopi okuti: ‘Ame himekuyeke. Ovanthu vove mavakala ovanthu vange, iya Huku yove makala Huku yange.’ Mokusoka kuove oñgeni Noemi elitehelela etyi Ruti apopia ngotyo?

Ruti na Noemi avehiki ko Isilayeli pomuvo wokuteya. Nthiki imwe, Ruti akapupulula mepia lio mulume utiwa o Boasi, omona wa Raabe. Weiva okuti Ruti ukala na Noemi iya umuhole unene. Apopila ovaundapi vae vayeke Ruti apupulule mepia ngetyi ahanda.

 Kongulohi etyi Ruti ehika meumbo, Noemi emupulu okuti: ‘Okepia lialie wakaundapele hono?’ Ruti apopi okuti: ‘Omepia lio mulume utiwa o Boasi.’ Noemi emupopila okuti: ‘Boasi ombunga yo mulume wange. Tualako okuundapa mepia liae novahikuena vakuenyi. Petupu ou mekuleve.’

Ruti atualako okupupulula mepia lia Boasi alo omuvo vokuteya wapua. Boasi aimbuka okuti Ruti omukai umwe omuwa undapa unene. Pononthiki ombo, inkha omulume umwe unkhia ahasipo ovana, umwe pombunga yae unepa omuhepe. Boasi avelinepe na Ruti. Omona wavo ankho utiwa o Obede, akala he mbuale Yohamba David. Omapanga a Noemi ahambukwa unene. Avapopi okuti: ‘Tete, Jeova wekuavela Ruti, ekulingi nawa pahe una omutekula. Tupandulei Jeova!’