Ọke orhọmo ọ homaphia uvuẹn ẹkwotọre Israel, onyẹ Israel owu re se Naomi ọrhẹ esa ye kugbe emọyen ehworhare awanva, ni kwa riẹ ẹkwotọre i Moab. Ọke oru, esa i Naomi no hwuru. Emọyen ehworhare awanva na, ni rọnmọ egbọtọ itu i Moab rẹ odẹ aye orhiẹ Ruth ọrhẹ Orpah. Ọrẹ omemwurhọ, emọ i Naomi awanva na, ni ji hwu.

Ọke i Naomi o rhon taghene emaren ọ ha uvuẹn Israel ne, no brorhiẹn rọ nọ ghwẹrioma rie. Ruth ọrhẹ Orpah ne lele i Naomi rie, ọrẹn, ọke aye a nya uvuẹn izede, Naomi nọ ta rẹn aye: ‘Are omamọ ene harẹn emọ mẹ ọrhẹ omẹmẹ. Mi guọlọre nẹ are awanva i rharhumu rọnmọ. Are i rharhumu riẹ i Moab.’ Emẹse na ni tare: ‘Ame i vwo ẹguọlọ kpahuọn! Ame a guọlọ nyajo vwo-o.’ Naomi nọ ta rẹn aye nẹ aye i ghwẹrioma. Ọke oru, Orpah nọ ghwẹrioma rie, ọrẹn, Ruth o kwe ghwẹrioma-a. Naomi nọ ta rẹn i Ruth: ‘Orpah ọ ghwẹrioma bru ihworho are ọrhẹ isolobrugwẹ are ne. Lelie nyarhẹn.’ Ọrẹn, Ruth nọ tare: ‘Mi nyajo vwo-o. Ihworho enọ ine rhiẹ ihworho mẹ, Osolobrugwẹ ọnọ, ono rhiẹ Osolobrugwẹ mẹ.’ Marhẹ wu rorori taghene oma o ru i Naomi ọke i Ruth ọ tẹmro erana?

Ruth ọrhẹ i Naomi ni te Israel ọke a kọrọ ewawọ i barley obọ. Ẹdẹ owu, Ruth no yo gbugbon uvuẹn ikebi ọhworhare owu re se i Boaz, ro rhiẹ ọmọ i Rahab. Boaz no rhonrin taghene i Ruth, onyẹ i Moab ro vwo atamwu kpahen i Naomi. Nọ ta rẹn ihworho ra wian riẹn taghene aye i nyajẹ ewawọ ezẹko vwo nẹ i Ruth ọ mẹrẹn gbon.

 Owuọwọn ẹdẹ ọrana, Naomi nọ nọ i Ruth: ‘Ikebi ọrọmo we gbugbon inyenana? Ruth nọ kpahenrhọ riẹn: ‘Ikebi ọhworhare owu re se i Boaz.’ Naomi nọ ta rẹn i Ruth: ‘Boaz usuẹn imizu esa mẹ. Rhe lele egbọtọ na wian uvuẹn ikebi ọnẹyen. Wu na mẹrẹn omefuon avwaye.’

Ruth nọ wian uvuẹn ikebi Boaz ọke ephian, bọmọke ọke orhọ na o ki hin. Boaz nọ mẹrẹnvwrurhe taghene i Ruth ọgba owian jeghwai omamọ ọmase. Ọke ọrana, ọhworhare orho hwu, ọrẹn, o vwiẹ ọmọ owuorowu-u, ọhworhare owu usuẹn imizie, nọ rọnmọ aniẹ. Omarana, Boaz nọ rọnmọ i Ruth. Aye ni vwiẹ ọmọ ọhworhare rẹ odẹ ye orhiẹ Obed, ro mo rhiẹ ọsẹ ọduado i David. Oma ọ merhen igbehian i Naomi omamọ. Aye ni tare: ‘Ukukaro, Jehova ọ yẹruọ i Ruth ro vwo ẹguọlọ kpahuọn, vwarana, wu vwo ovwrọmọ ne. Jenẹ ujiri o rhirhiẹ ye rẹn i Jehova.’