Pa jun tiempo xpe wiʼjal pa ri tinamit Israel. Rumal laʼ jun ixoq israelita ubʼiʼ Noemí xbʼe rukʼ ri rachajil xuqujeʼ kukʼ ri e kebʼ ral pa ri tinamit re Moabʼ. Tekʼuriʼ qʼaxinaq chi ri qʼij ri rachajil ri Noemí xkamik. Ri e kebʼ ral xekʼuliʼ kukʼ kebʼ ixoqibʼ moabitas: Rut xuqujeʼ Orpá. Are kʼu sibʼalaj bʼisobʼal, qʼaxinaq chi ri qʼij ri e ral ri Noemí xuqujeʼ xekamik.

Are chiʼ Noemí xuta che kʼo ta chi wiʼjal pa ri tinamit Israel, xuchomaj che ktzalij pa ri utinamit. Rut xuqujeʼ Orpá xebʼe rukʼ, are kʼu pa ri bʼe Noemí xubʼij chke: «Sibʼalaj ix utz taq ixoqibʼ xixux utz taq alibʼatz. Kwaj che kixkʼuliʼ chi jumul. Chixtzalij kan pa ri iwachoch pa Moabʼ». Ri e ixoqibʼ xkibʼij che: «Sibʼalaj katqaj, kqaj taj katqaya kan atukel». Noemí xubʼij chi jumul chke che ketzalij kan pa ri kitinamit. Kʼisbʼal re, Orpá xbʼek, are kʼu ri Rut xkanaj kanoq. Noemí xubʼij che ri Rut: «Orpá xtzalij pa ri utinamit xuqujeʼ kukʼ ri udioses. Jat rukʼ, xuqujeʼ chattzalij cho rachoch ri amamá». Are kʼu ri Rut xubʼij che: «Katinya ta kan atukel. Ri atinamit kux na nutinamit xuqujeʼ ri aDios kux na nuDios». ¿Jas kachomaj che xunaʼ Noemí chiʼ Rut xubʼij wariʼ?

Rut xuqujeʼ Noemí xeʼopan pa Israel chi xmaj uqʼatik ri cebada. Pa jun qʼij, Rut xbʼe che uyakik uwach ri cebada che tasom kan pa ri rulew ri Boaz, che are ri ral ri Rahab. Boaz retaʼm che ri Rut are moabita che xux sukʼ che ri Noemí xuqujeʼ che xkanaj kan rukʼ. Areʼ xubʼij chke ri rajchakibʼ che kkiya kan más ri uwach ri cebada pa ri ulew rech kʼo kuriq ri Rut.

 Pa ri chaqʼabʼ riʼ, Noemí xutaʼ che ri Rut: «¿Jachin rukʼ xatchakun wi kimik?». Rut xubʼij che: «Pa ri rulew ri Boaz». Noemí xubʼij che: «Boaz are jun rachalal ri wachajil. Kaya ta kan ri chak pa ri rulew kukʼ ri nikʼaj chi alitomabʼ. Chilaʼ katkʼojiʼ pa jamaril».

Rut xuya ta kan ri uchak pa ri rulew ri Boaz kʼa chiʼ xkʼis ri qʼatoj. Boaz xrilo che ri Rut are jun utzalaj ixoq xuqujeʼ sibʼalaj ajchak. Pa ri tiempo riʼ, we jun achi kkamik xuqujeʼ e kʼo ta ralkʼwal, jun rachalal kkunik kkʼuliʼ rukʼ ri malkaʼn ixoq. Rumal laʼ Boaz xkʼuliʼ rukʼ Rut. Xkʼojiʼ jun kalkʼwal xkikoj Obed che ubʼiʼ. Qʼaxinaq chi ri e junabʼ, Obed xux umam ri ajawinel David. Ri e rachiʼl ri Noemí sibʼalaj kekikotik. Xkibʼij che: «Nabʼe, Jehová xuya ri Rut chawe, sibʼalaj utz ubʼanom awukʼ. Xuqujeʼ kimik kʼo chi jun awimam. Chqaqʼijilaj ri Jehová rumal wariʼ».