Israelpi achca yaricai tiyashcamantami Noemí shuti huarmica paipaj cusandij, ishqui churindij Moab llajtapi causanaman rircacuna. Chaipimi Noemipaj cusaca huañurca. Paipaj churicunaca moabita huarmicunahuanmi cazararcacuna. Chai huarmicunaca Rut, Orpá shuticunami carca. Qꞌuipaca paipaj ishqui churicunapishmi huañurca. Chaica llaquimi carca.

Israelpi yaricai tucurishcata uyashpami Noemica paipaj llajtaman tigrarca. Rutpish Orpapish paihuanmi rircacuna. Ñanta ricushpaca Noemica, ‘cancunaca alli huarmicuna, alli nueracunami cashcanguichij. Cutin cazarachunmi munani. Moab llajtaman tigraichijlla’ nircami. Paicunaca, ‘cantaca achcatami cꞌuyanchij, mana canllata saquisha ninchijchu’ nircacunami. Noemí cutin cutin tigraichijlla nijpimi Orpaca tigrarca. Pero Rutca mana tigrarcachu. Chaimantami Noemica, ‘Orpaca paipaj llajtaman, paipaj dioscunapajman tigranmi. Canpish paihuan rilla, cambaj mamapaj huasiman tigrai’ nircami. Rutca, ‘can maiman rishcamanmi ñucapish risha. Cambaj Diospish ñuca Diosmi canga’ nircami. Noemí chaita uyashpaca ¿ima shinashi sintirishca canga?

Rutpish Noemipish Israelpi cozicha callaricujpimi chayarcacuna. Shuj punllaca Rutca Boozpaj (Boaz) chagrapimi chꞌalanaman rirca. Boozca Rahabpaj churimi carca. Rutca moabita cashpapish Noemita cꞌuyashcamanta paita mana saquishcatami Boozca uyashca carca. Chaimantami paipaj trabajadorcunataca, ‘Rut huarmi chꞌalachun granocunata ama tucuita japinguichij’ nirca.

 Chai tutallatajmi Noemica Ruttaca, ‘¿maipitaj trabajamungui?’ nircami. Paica, ‘Boozpaj cozichapimi chꞌalamuni’ nircami. Noemica, ‘chai runaca ñuca cusapaj familiamari. Paipajta ruraj huarmicunahuan chꞌalashpa catinguilla. Chaipimi alli cangui’ nircami.

Rutca cozicha tucuringacamami Boozpaj chagrapi trabajarca. Rutca trabajadora, alli huarmi cashcatami Boozca ricurca. Chai tiempopica huahuacunata mana charishpa shuj runa huañujpica shuj familiami viuda huarmihuan cazarai tucurca. Chaimantami Boozca Ruthuan cazararca. Paicunaca shuj huahuatami charircacuna. Obed shutitami shutichircacuna. Qꞌuipaca Obedca rey Davidpaj abuelomi tucurca. Noemipaj amigacunaca achcata cushicushpami, ‘Diosca canta cꞌuyaj alli huarmi Ruttami cushca. Cunanca nietotapish charinguimi. Chaimanta Jehová Diosta alabashunchij’ nircacunami.