Israel nacionpi yarqay kaptinmi Noemiyqa qusanwan hinaspa iskay qari wawankunapiwan Moab nacionman ripukurqaku. Chaypim qusan wañukurqa, qari wawankunañataqmi Moab casta warmikunawan casarakururqaku. Llumchuyninkunapa sutinmi karqa Rut hinaspa Orfa. Tiempopa risqanman hinataqmi wawankunapas wañukurqaku.

Chaymi Noemiyqa Israel nacionpi yarqay manaña kaptin, llumchuyninkunawan kutikurqa. Ichaqa ñanpim nirqa: “Qamkunaqa sumaq sunquyuqmi kankichik, aylluykichikman kutikuspayá kaqmanta casarakamuychik”, nispa. Paykunañataqmi kutiyta mana munarqakuchu. Hinaptinmi Noemiy hikutaptin Orfaqa kutikurqa, Rutñataqmi mana. Chaymi Noemiyqa Ruttapas hinalla nirqa: “Waqaya llumchuymasikiqa llaqtanmanwan diosninkunaman kutikun, qampas mamaykipa wasinmanyá kutikuy”, nispa. Rutmi ichaqa nirqa: “Manam saqikimanchu. Llaqtaykim llaqtay kanqa, Diosnikipas Diosniymi kanqa”, nispa.

Rutwan Noemiyqa Israel nacionmanmi cebada rutuy kachkaptin chayarurqaku, chaymi Rutqa Boozpa chakranta pallapakuq rirqa. Boozqa karqa Rahabpa wawanmi. Boozqa yacharqam Rutqa Moab nacionniyuq kasqanta hinaspa suegranta yanapaq qatimusqantapas, chaymi llamkapuqninkunata nirqa: “Amam lliwchataqa ruturunkichikchu, saqiykunkichikmi Rut pallapakunanpaq”, nispa.

 Chay tutam Noemiyqa Rutta tapurqa: “¿Maypitaq pallapakamurqanki?”, nispa. Rutñataqmi nirqa: “Boozpa chakranpim”, nispa. Hinaptinmi Noemiyqa nirqa: “Boozqa ayllunchikmi, chakrallanpiyá pallapakuy”, nispa.

Rutqa suegranta kasukuspam chay chakrallapi pallapakurqa, chaynapim Boozpas Rutpa allin llamkasqanta qawarqa. Chay tiempopiqa pi qaripas mana churiyuq wañukuptinqa chay wañukuqpa ayllunmi viudawan casarakuyta atinman karqa, chayraykum Boozqa Rutwan casarakurqa. Hinaptinmi churin karqa Obed, chaymi warmikuna Noemiyta kusisqa nirqaku: “Diosmi kuyakuq llumchuyta quykusunki hinaspa willkatapas, chayraykuyá Jehova Dios hatunchasqa kachun”, nispa. Chaymantañataqmi Obedqa kamachiq Davidpa abuelon karqa.