Israeelete gobbara hude batidhuta, Naaoomi yinanni Israeelawitte minaannisenna lame labballo oosose ledo Moaabi gobba hadhu. Yannate gedensaanni Naaoomi minaanni reyi. Oosose, Ruutinna Orfa yinannire Moaabi gobba seenne adhitu. Gedensaanni Naaoomi oosono reyitino.

Naaoomi Israeelete gobbanni hude baꞌinota macciishshite, Moaabi gobbanni agurte higgara kaꞌu. Ruutinna Orfano ledose haꞌra hanafi; kayinni doogote heeꞌreenna Naaoomi togo yitunsa: ‘Kiꞌne aneranna oosoꞌyara dancha coye assitinoonni. Lamenti galagaltine mine assiꞌra dandiitinanni. Xaate qaeꞌne Moaabi higge.’ Ruutinna Orfa togo yii: ‘Banxeemmohe! Atewiinni dibaxxineemmo.’ Naaoomi duucha higge ‘Agurtine qaeꞌne higge’ yitunsa. Hakkiinni Orfa agurte higgu, Ruuti kayinni higa gibbu. Naaoomi Ruuti togo yitu: ‘Orfa mannisewanna magannasewa higgino. Atino ledose higge, amakkiwa haꞌri.’ Ruuti kayinni togo yitu: ‘Ate agure dihaꞌreemma. Mannikki mannaꞌyaati, Maganikkino Maganoꞌyaati.’ Ruuti hatto yituta, Naaoomi mageeshshi geeshsha hagiidhitinoha lawannohe?

Ruutinna Naaoomi Israeelete gobba iillinohu hayixe mindanni yannaraati. Mitto barra Ruuti mindanna giggilino gide xinqidhara Boeezi gatira hadhu; Boeezi Reaabi iltino beettooti. Isi Naaoomi Moaabi gobbara heedheenna Ruuti kaaꞌlitinoseta macciishshino. Isi gide midannosi manna, ‘Nadallate mereerinnino xinqidhona hooltinoontese’ yii.

 Hatte hawarro Naaoomi Ruuti ‘Techo aye gate xinqidhanni hositta?’ yite xaꞌmitu. Ruuti qolte, ‘Boeezi yinanni manchi gate xinqiꞌranni hosoomma’ yitu. Naaoomi Ruutira togo yitu: ‘Isi fiixankeeti. Isi gate noo seenni ledo xinqiꞌrittaro woyyannohe.’

Ruuti gide minde gunda geeshsha Boeezi gate xinqidhino. Boeezi Ruuti chaachaaranna worba ikkitinota huwati. Hakkawaro mittu manchi ooso ilikki reyiro, galtesi fiixisi adhanno. Konni daafira Boeezi Ruuti adhi. Insa Iyoobeedi yinanni qaaqqo ili; Iyoobeedi moote Daawiti ahaahooti. Naaoomi jaalla hagiidhite togo yitu: ‘Baxxannoheta Ruuti uyinohehuranna towaatannoheha labbaa beetto uyinohehura Yihowara galatu iillosi.’