Ngesikhatsi sendlala lenkhulu ka-Israyeli, lomunye make lokutsiwa nguNawomi wahamba nendvodza yakhe kanye nemadvodzana abo lamabili baya eveni lakaMowabi. Ngekuhamba kwesikhatsi indvodza yaNawomi yafa. Lamadvodzana aNawomi agcine atitsatsele bafati eveni lakaMowabi, lebekuboRuthe na-Opha. Lokubuhlungu kutsi ngemuva kwesikhatsi emadvodzana aNawomi afa.

Nakeva kutsi indlala beseyiphelile ka-Israyeli, Nawomi wabuyela emuva. BoRuthe na-Opha bahamba naye, njengobe bebasendleleni Nawomi watsi kubo: ‘Niwubonisile kimi nasemadvodzeni enu lasashonile. Shengatsi ngamunye wenu angatfola kulondzeka ekhaya lendvodza yakhe. Ncandzekani, nibuyele kaMowabi.’ Labomakoti bakhe batsi: ‘Cha, sitawuhamba nawe siye kubantfu bakini.’ Nawomi bekasolo abancenga kutsi bajike. Ekugcineni, Opha wajika kepha Ruthe wala kujika. Nawomi watsi kuye: ‘Opha sewubuyele kubantfu bakubo nakubonkulunkulu bakhe. Ncandzeka naye.’ Kodvwa Ruthe watsi: ‘Ngitawuhamba nawe. Bantfu bakini batakuba bantfu bakitsi futsi Nkulunkulu wakho utawuba nguNkulunkulu wami.’ Ucabanga kutsi wativa njani Nawomi ngesikhatsi Ruthe asho njalo?

Ruthe naNawomi befika ka-Israyeli ngesikhatsi kucalwa kuvunwa ibhali. Ngalelinye lilanga, Ruthe wahamba wayobutsa lobekusele nakuvunwa emasimini alenye indvodza lokutsiwa nguBhowazi, lobekayindvodzana yaRahabi. Bekati kutsi Ruthe uvela kaMowabi futsi bekamhlonipha maketala wakhe Nawomi. Watjela tisebenti takhe kutsi nativuna tiboshiya lokuncane kuze kube khona lakutfolako naRuthe.

 Ebusuku bangalelo langa Nawomi wabuta Ruthe watsi: ‘Ukhwanye kuphi lamuhla?’ Ruthe watsi: ‘Emasimini endvodza lebitwa ngekutsi nguBhowazi.’ Nawomi watsi kuye: ‘Bhowazi usihlobo setfu. Kuncono kutsi uhambe naletincekukati tayo kunekutsi uhlushwe kulenye insimi.’

Ruthe wachubeka asebenta emasimini aBhowazi baze bacedza kuvuna. Bhowazi wabona kutsi Ruthe ukhutsele futsi ungumfati lohloniphako. Ngesikhatsi sabo, nangabe indvodza ifa ite bantfwana, sihlobo sayo besibese sishada lomfati wayo. Bhowazi wase ushada naRuthe. Batala indvodzana labayetsa batsi ngu-Obedi, leyagcine ingumkhulu weNkhosi Davide. Bangani baNawomi bajabula kakhulu. Batsi: ‘Akadvunyiswe Jehova lowente kutsi kube nemuntfu lonelilungelo lekunitsenga lamuhla. Shengatsi ligama lakhe lingamenyetelwa ka-Israyeli!’