PĚNGANGĚNDUNGANG 33
Rut dingangi Naomi
Su tempong piạ karal᷊unusẹ̌ su Israel, sěngkatau wawine Israel arenge Naomi něngal᷊ing sarang Moab dingangu kawinge lai duang katau anạe esẹ. Samurine, kawing i Naomi nate. Manga anạe nẹ̌kawing dingangi Rut lai Orpa, manga wawine bọu Moab. Katewe manga anạe lai samurine nate.
Su tempong i Naomi nakaringihẹ̌ karal᷊unusẹ̌ seng nal᷊iu, i sie nẹ̌bal᷊ị sarang Israel. I Rut dingangi Orpa timol᷊e dingange. Katewe su ral᷊engang, Naomi naul᷊ị, ’I kamene seng nakoạ kawing dingangu anạ mantu mapia. Iạ mapulu i kamene saụ mẹ̌kawing. Kapul᷊ẹe sarang Moab.’ Manga wawine ene naul᷊ị, ’I kami masayang si Mamạ! I kami madiri měněntang si Mamạ.’ Katewe, i Naomi tatapẹ̌ něngoro si rẹ̌dua tadeạu mapul᷊ẹ sarang Moab. Samurine, i Orpa napul᷊ẹ, katewe i Rut tatapẹ̌ dingangi Naomi. Naomi naul᷊ị, ’I Orpa seng napul᷊ẹ sarang bangsane dingangu mawune. Pẹ̌bal᷊ịe dingange, kụ kapul᷊ẹe sarang bal᷊eng i mamạu.’ Katewe i Rut naul᷊ị, ’Iạ tawe měněntang si Mamạ. Bangsang i Mamạ sarung makoạ bangsaku, dingangu Mawung i Mamạ lai sarung makoạ Mawuku.’ Tumuhụ si kau, kerea pěndang i Naomi nakaringihẹ̌ bawerang i Rut?
I Rut dingangi Naomi nahumpạ su Israel su tempong panen barli něnětạ. Rut něngemong lěmbeng barli su baelẹ̌ i Boaz, anạ i Rahab. Boaz nakaringihẹ̌ i Rut kai tau Moab kụ i sie masatia si Naomi. Hakị u ene, i Boaz něngoro su manga mělahal᷊ẹ̌e gunang mělěmbe limembong lawọ barli su baelẹ̌ gunang i Rut.
Su hěbine, i Naomi nẹ̌kiwal᷊o si Rut, ’I kau něhal᷊ẹ̌ su baelẹ̌ i sai sahěllo ini?’ Rut simimbahẹ̌, ’Su baelẹ̌ i Boaz.’ Bọu ene i Naomi nẹ̌bera, ’I Boaz ene kěluargang kawingku. Turusẹ̌e pěhal᷊ẹ̌ sene dingangu manga wawine wal᷊inẹ. I kau aman sene.’
Rut něhal᷊ẹ̌ su baelẹ̌ i Boaz sarang pěngěnsuengu panen. Boaz nakasilo i Rut kai marading dingangu sěbạe mapia. Su tempo ene, mạeng sěngkatau esẹ nate kụ tawẹ apa anạe esẹ, anạu sěngkataune sarung mẹ̌kawing dingangu kawingu tau seng nate ene. Hakị u ene, i Boaz nẹ̌kawing dingangi Rut. I rẹ̌dua nakaěbạ anạ esẹ arenge i Obed, kụ sarung makoạ opang i Datu Daud. Manga hapị i Naomi sěbạe mal᷊uasẹ̌. I sire naul᷊ị, ’Humotong, Yehuwa něgělị i Rut si kau, kụ i sie sěbạe mapia si kau. Orasẹ̌ ini si kau seng piạ pulung. Karaloko i Yehuwa.’
”Piạ hapị limembong marani bọu anạu sěngkatau.”—Amsal 18:24