Zum u ijen gba ken Iserael yô, kwase ugen ken Iserael mough vea nom na kua ônov vev mba nomso uhar, ve yem ve za tema ya ken tar u Moabi. Iti i kwase shon ér Naomi. Shighe kar yô, nom na kpe. Ônov nav vôso ônkasev mba ken tar u Moabi. Kwase u môm la iti na ér Rutu, ugen la di iti na ér Orpa. Kwagh er vihi yô, ônov mba Naomi mba nomso mbara kpa shi va kpe.

Naomi va ungwan ér ijen bee ken tar u Iserael yô, a mough ken tar u Moabi a gba hiden ken tar na. Rutu man Orpa kpa lu yemen vea na. Kpa er ve lu yemen sha gbenda la, Naomi kaa a ve ér: ‘Shighe u ônov av mba nomso mbara lu uma la, ne lu kasev vev mba fan kwagh kpishi, shi mo kpa ne er a mo dedoo. Nahan m soo mer hide er nen noov. Yô hide yem nen ken Moabi.’ Kpa kasev mbara gema kaa a na ér: ‘U doo se ishima! Nahan se soo u undun we ga.’ Kpa Naomi zer kaan a ve ér ve hide ve yem. Ken masejime yô, Orpa hide yem, kpa Rutu yô, lu vea Naomi her. Tsô Naomi kaa a na ér: ‘Orpa hide ngu yemen hen ior enev man mbaaôndo enev. Yô yem vea na imôngo.’ Kpa Rutu kaa ér: ‘Mo me undu u ga. Ior ou vea lu ior av, shi Aôndo wou kpa una lu Aôndo wam.’ Shighe u Rutu ôr kwagh ne la, u hen wer yange a lu Naomi ken ishima nena?

Yange Naomi man Rutu hide ken Iserael shighe u ka i hii u sundan iyiav la. Nahan iyange igen yô, Rutu yem u za yaren twar ken sule u orgen, iti na ér Boashi. Lu wan u Rahabi. Yange ungwa ér Rutu ka wankwase ken Mbamoabi, u lu eren a Naomi dedoo yô. Nahan a kaa a mbatomov nav ér ve shi samuyia ken sule kpuaa sha er Rutu una yar twar yô.

 Sha iyange la aikighe, Rutu za hiden yô, Naomi pine un ér: ‘Ka ken sule u ana u za yar twar nyiana?’ Rutu gema kaa a na ér: ‘Ka ken sule u orgen, iti na ér Boashi.’ Naomi kaa a na ér: ‘Boashi ka anmgbian u nomom. Nahan za hemen u yaren twar ken sule na vea agumaukase agen. Kwagh a za u iyol ken sule na ga.’

Tsô Rutu za hemen u yaren twar ken sule u Boashi zan zan i kar sundan iyiav been. Boashi nenge ér Rutu ka kwase u taver iyol shi a fa kwagh kpishi. Sha ayange la, yange or a kpe nana undu wan u nomso ga yô, anmgbian u nan nan vôso kwase u or shon. Nahan Boashi vôso Rutu. Ve mar wan u nomso, ve ii un iti ér Obedi. Obedi di gema mar baba u Tor Davidi. Kwagh ne yange doo azende a Naomi kpishi. Ve kaa ér: ‘Kwagh u hiihii yô, Yehova na u Rutu, ngu eren a we doo doo, shi hegen ne, a mar wan u nomso, ka wan u wan wou je. I wuese Yehova.’