Pa nyengu yo ku Yisraele kwenga nja, Naomi yo wenga Muyisraele, wanguluta ku Moabu ndi murumu waki kweniso ŵana ŵawu ŵaŵi anthurumi. Pati pajumpha nyengu, murumu waku Naomi wangufwa. Mwana waki munyaki wanguto Ruti ndipu munyaki wanguto Oropa. Anthukazi yaŵa ŵenga achimoabu. Chakupasa chitima chenga chakuti, pati pajumpha nyengu ŵana anthurumi aku Naomi angufwa.

Naomi wati wavwa kuti nja yikumala ku Yisraele, wanguŵanaŵana kuti wawere kwaki. Ruti ndi Oropa angusoke nayu limoza kweni ŵe munthowa, Naomi wanguŵakambiya kuti: ‘Mwenga anthukazi amampha ku ŵana ŵangu kweniso mwenga akumwana ŵangu amampha. Ndikhumba kuti mosi muyirwi so. Weriyani kwinu ku Moabu.’ Anthukazi wo anguti: ‘Titikuyanjani! Tikhumba cha kukusiyani.’ Naomi wangulutiriza kuŵakambiya kuti awere kwawu. Pakumaliya, Oropa wanguwerere kweni Ruti wangukana. Naomi wangumukambiya kuti: ‘Oropa waluta ku ŵanthu ŵaki ndi achiuta ŵaki. Nawiso luta.’ Ruti wangumuka kuti: ‘Ndikusiyeningi cha. Ŵanthu ŵinu amuja ŵanthu ŵangu ndipu Chiuta winu wamuja Chiuta wangu.’ Kumbi uwona kuti Naomi wanguvwa wuli ndi vo Ruti wangumuka?

Ruti ndi Naomi angufika ku Yisraele pa nyengu yo ŵanthu ayambanga kuvuna balere. Zuŵa linyaki, Ruti wanguluta kuchitondoleza balere mumunda wa munthurumi munyaki zina laki Boazi yo wenga mwana waku Rahabi. Iyu wanguvwa kuti Ruti wenga wachimoabu ndipu wenga wakugomezeka kwaku Naomi. Boazi wangukambiya antchitu ŵaki kuti asiyengi balere muvuli kuti Ruti watondongi.

Ndimazulu, Naomi wangufumba Ruti kuti: ‘Kumbi wachitondolezanga mumunda waku yani msanawale?’ Ruti wangumuka kuti:  ‘Ndachitondolezanga mumunda wa munthu munyaki zina laki Boazi.’ Naomi wangumukambiya kuti: ‘Boazi njumoza mwa abali a murumu wangu. Ulutirizi kutondoleza mumunda wa munthu mwenuyu pamoza ndi antchitu ŵaki anthukazi. Akuchitiyengi chiheni chechosi cha.’

Ruti wangulutiriza kutondoleza mumunda waku Boazi mpaka po angumaliya kuvuna. Boazi wanguwona kuti Ruti walimbikiyanga kugwira ntchitu ndipu wenga munthukazi wamampha. M’mazuŵa ngenanga, asani munthurumi wafwa ndipu walivi ŵana anthurumi, abali ŵaki atonga nthengwa munthukazi yo wasiya. Mwaviyo, Boazi wanguto Ruti. Yiwu angubala mwana yo angumudana kuti Obede yo pavuli paki wanguzija mbuyaki waku Davidi. Anyaki aku Naomi angukondwa ukongwa. Yiwu angukamba kuti: ‘Chakwamba, Yehova wakukupasa Ruti yo wakuchitiya vinthu vamampha ukongwa ndipu sonu we ndi mzuku munthurumi. Yehova watumbikiki.’