Chiindi nikwakali nzala muchisi chaIsrayeli, umwi muIsrayeli wakali kutegwa Nawomi wakalongela kunyika yaMowabbu kalaamwi amulumi wakwe abana bakwe babili balombe. Mukuya kwachiindi, mulumi waNawomi wakafwa. Bana baNawomi bakakwata bakayintu bakuMowabbu bategwa Rute aOpa. Pesi mukuya kwachiindi, bana baNawomi abalabo bakafwa.

Nawomi naakamvwa kuti kuIsrayeli takuchikwe nzala, wakayeeya kubweeda kulimbabo. Rute aOpa bakiinkaamwi aNawomi pesi kabachili munzila, Nawomi wakababuzya kuti: ‘Mwakali bakayintu bali kabotu kubana bangu alimwi mwakanditondeezya luyando. Ndiyanda kuti mukakwatwe lubo, nkinkaako, amubweede kuMowabbu.’ Mpawo bamukabana bakwe bakati: ‘Tulakuyanda! Tatukakusiyi pe.’ Pesi Nawomi wakabakombelezya kuti babweede. Kuzwa waawo, Opa wakabweeda, pesi Rute wakasyaala. Mpawo Nawomi wakabuzya Rute kuti: ‘Bona Opa ulikubweeda kunzubo zyakwe akuli baleza bakwe. Bweeda anguwe.’ Pesi Rute wakati: ‘Tandikusiyi pe. Bantu bako bayooba bantu bangu aLeza wako uyooba Leza wangu.’ Ubonaanga Nawomi wakamvwa biyeni atala azyakaambwa aRute?

Rute aNawomi bakasika kuIsrayeli chiindi nikwakali kutebulwa bbali. Bumwi buzuba, Rute wakaya kukuvulula bbali kumuunda waBbowazi, wakali mwana waRahabbu. Bbowazi wakamvwa kuti Rute wakali kuzwa kuMowabbu akuti wakasala kukkala aNawomi. Kuzwa waawo, Bbowazi wakabuzya babelesi bakwe kuti basiile Rute bbali kuchitila kuti avulule.

 Nilyakaba goko, Nawomi wakabuzya Rute kuti: ‘Wali kubeleka kuli sunu?’ Mpawo Rute wakati: ‘Ndali kubeleka mumuunda waBbowazi.’ Nawomi wakabuzya Rute kuti: ‘Bbowazi ninzubo yamulumaangu. Kobelekela mumuunda wakwe aamwi ababelesi bakwe basimbi. Kuchita oobo kuyookukwabilila.’

Rute wakiinkilila kunembo akuvulula mumuunda waBbowazi kusikila nikwakamana kutebula. Bbowazi wakabona kuti Rute wakali mwanakazi uuli kabotu akuti wakali kubeleka changuzu. Muchiindi eecho, kwakali kuzumizigwa kuti mukayintu wakafwidwa mulumi katakwe bana, akwatwe anzubo yamwaalumi wakamukwete. Mpawo Bbowazi wakakwata Rute. Bbowazi aRute bakaba amwana wakategwa Obbedi, wakazooba sianyinakulu waMwaami Davida. Beenzinyina baNawomi bakabotelwa loko. Bakaamba kuti: ‘Jehova wakasanguna kukupa Rute walikukugwasya, lino wakupa muzukulu. Alumbwe Jehova.’