Ajyi jun tyempo ja bʼa Israel ajyi waʼin. Ja yuj, jun israʼelenya sbʼiʼil Noemí waj bʼa slujmal Moab, cha waj ja statam soka chabʼ yuntikil. Tsaʼan ja statam ja Noemí chami. Jaxa chabʼ yuntikil nupaniye sok chabʼ ixuke bʼa Moab. Ja Rut soka Orpá. Pe yajni ekʼ ja tyempo, jelni triste yabʼjel yujni ja chabʼ yuntikil ja Noemí chamye.

Yajni ja Noemí yabʼ ekʼta ja waʼin ja bʼa Israel, tixa kumxi. Ja Rut soka Orpá wajye soka Noemí, jaxa bʼa bʼeji ja Noemí yala: «Ja weʼnlex kʼotyex lekil cheʼumal sok lekil alibʼal. Wa xkʼana oj cha nupananik. Kumxanik bʼa Moab». Jaxa chabʼ ixuk yalawe: «Jel wa xkʼanawatikon, mini oj kaʼatikonkan». Ja Noemí tikʼanxta yala akumxuke ja bʼa chonabʼ. Anto ja Orpá kumxi, pe ja Rut miyuk. Ja Noemí yala: «Ja Orpá kumxi ja bʼa xchonabʼ soka sdyosiki. Kumxan soka yeʼn sok kaʼax bʼa snaj jawa nani». Pe ja Rut yala: «Mini oj kaʼakan. Jawa chonabʼ jani ja jchonabʼ soka wa Dyos jani ja jDyosi». ¿Jastal maʼ yabʼ ja Noemí soka jas yala ja Rut?

Jani ja styempoʼil ja cebada yajni ja Rut soka Noemí kʼotye bʼa Israel. Jun kʼakʼu, ja Rut waj stsom ja sbʼakʼ cebada ja bʼa yalaj ja Boaz, jani snan ja Rahab. Ja Boaz yabʼ ja Rut jun moabita bʼa mini yakan ja Noemí sok ajyi soka yeʼn. Ja Boaz yala yabʼ ja yaʼtijumiki oj yawekan mas ja sbʼakʼ cebada ja bʼa yalaji bʼa jachuk oj stsom ja Rut.

 Ja bʼa akwal jaw, ja Noemí sjobʼoyi ja Rut: «¿Maʼ yalaj aʼtijiya ja bʼa kʼakʼu it?» Ja Rut yala: «Ti bʼa yalaj ja Boaz». Jaxa Noemí yala yabʼ: «Ja Boaz jani spamilya kʼotel ja jtatami. Mokni wakan aʼtel soka akʼixuki ja bʼa alaj jaw. Ja tiw mini jas oj ekabʼaj».

Ja Rut mi yakan aʼtel ja bʼa yalaj ja Boaz man chʼak ja aʼteli. Ja Boaz yila ja Rut kʼotel jun lekil ixuk sok jel x-aʼtiji. Ja bʼa tyempo jaw, ta jun winik chami sok mi ajyi yuntikil, june ja bʼa spamilya oj bʼobʼ nupanuk soka biguda. Ja yuj ja Boaz nupanisok ja Rut. Ajyiyujile jun yal skerem sok ya sbʼiʼiluke Obed. Jabʼilik tsaʼan, ja mandaranum David jani kʼot statawelo ja Obed. Ja yamigaʼik ja Noemí jel gustoʼaxiye. Wa xyalawe yabʼ: «Bʼajtan, ja Jyoba yawi ja Rut, bʼa lekni sjeʼunej ja smodo amoki. Ja wego ayxa juna wij. Yuja it la jtoytik ja Jyoba».