Enjara y’amaani obu yagwire omu Isareri, Naomi na musaija we hamu n’abatabani babo babiri bakafuruka kuruga omu Isareri bagenda Moabu. Hanyuma y’akasumi, iba Naomi akafa. Omu ha batabani akaswera omukazi arukwetwa Rusi, kandi ondi yaswera omukazi arukwetwa Orupa. Abakazi banu bakaba b’ihanga lya Moabu. Eky’enaku kiri ngu obwire bukahika batabani ba Naomi boona baafa.

Naomi obu yahuliire ngu omu Isareri enjara ekaba ehoireyo, akacwamu kugarukayo. Rusi na Orupa bakagenda hamu nauwe, baitu obu bakaba bakyali omu muhanda, Naomi akabagambira ati: ‘Mukaba bakazi barungi hali batabani bange kandi na hali nyowe mukaba baana barungi. Ningonza muswerwe omurundi ogundi nahabweki mugarukeyo owanyu omu Moabu.’ Abakazi bakamugarukamu bati: ‘Nitukugonza! Titurukugonza kukuleka.’ Baitu Naomi akaikara n’abagambira bagarukeyo. Obwire bukahika Orupa y’agarukayo baitu Rusi yayanga. Naomi akamugambira ati: ‘Orupa agarukireyo hali abantu be nabaruhanga be. Naiwe muhondere kandi ogaruke omu ka ya maama waawe.’ Baitu Rusi yamugarukamu ati: ‘Tindukwija kukuleka. Abantu baawe nibaija kuba bantu bange, kandi Ruhanga wawe n’aija kuba Ruhanga wange.’ Notekereza Naomi akehurra ata Rusi obu yamugarukiremu ati?

Rusi na Naomi bakahika omu Isareri omu busumi bw’amagesa ga sayiri. Kiro kimu, Rusi akagenda kusorooza eby’okulya ebikaba bisigaliire hanyuma y’okugesa omu musiri gw’omusaija arukwetwa Boazi ow’akaba ali mutabani wa Rahabu. Boazi akahurra ngu Rusi akaba ali mukazi Omumoabu ayacwiremu kugumira hali Naomi. Omusaija onu akagambira abakozi be ngu obu baraaba nibagesa, basigeho eby’okulya Rusi eby’arasorooza.

 Rusi obu yatahire rwebagyo, Naomi akamukaguza ati: ‘Kiro kinu osoroize omu musiri gwoha?’ Rusi yamugarukamu ati: ‘Omu musiri gw’omusaija arukwetwa Boazi.’ Naomi yamugambira ati: ‘Boazi munyabuzaale wa iba nyowe. Omu musiri gwe nuho ogendege n’abaisiki abandi habwokuba abantu b’oku tibarukwija kukuhikyaho akabi.’

Rusi akagumizaamu n’akora omu musiri gwa Boazi kuhikya amagesa obu gahoire. Boazi akarora ngu Rusi akaba ali mukozi w’amaani kandi mukazi murungi. Omu kasumi ako, omusaija obu yafaaga atazaire abaana aboojo, omunyabuzale we yasweraga omufakati ogu. Nahabweki Boazi akaswera Rusi. Bakazaara omwana ou barukire ibara Obedi kandi ayafookere isenkuru Daudi. Banywani ba Naomi bakasemererwa muno. Bakamugambira bati: ‘Yahwe akabanza kukuha Rusi anyakwikaire ali muntu murungi haliiwe, kandi hati akuhaire omwijukuru omwojo. Yahwe ahaisanizibwe.’