Израильге аш-чут эгелээрге, Ноемин дээр израиль херээжен кижи ашаа база ийи оглу-биле Моавче көже берген. Соонда Ноеминниң ашаа чок апарган. Ооң оолдары Руф биле Орфа дээр Моав чурттуг уругларга өгленип алган. Муңгаранчыг чүүл, Ноеминниң оолдары база чок апарган.

Ноемин Израильде аш-чут төнген деп дыңнааш, дедир чанар дээн. Руф биле Орфа база ооң-биле чорупкан. Орук ара Ноемин оларга: «Мээң оолдарымга дыка эки кадайлар болдуңар, а меңээ уругларым ышкаш апардыңар. Моавче баргаш, катап өг-бүледен тудуп алыңар» — дээн. Олар: «Бис сеңээ ынак бис, сени чааскаан арттырбас бис» — деп харыылаан. Ынчалза-даа Ноемин оларны чоруптар кылдыр ээрежип-ле турган. Орфа чана бээрге, Руф артып калган. Ноемин Руфка чугаалаан: «Орфа чонунче, бурганнарынче чорупту. Сен база аваңның бажыңынче чана бер». Руф аңаа: «Мен сени кагбас мен. Сээң чонуң — мээң чонум, сээң Бурганың — мээң Бурганым боор» — дээн. Чүү деп бодаар сен, Ноемин ол үеде чүнү миннип турган?

Руф биле Ноемин Израильге тараа ажаар үеде чедип келген. Бир катап Руф Вооз дээр кижиниң шөлүнче тараа артынчызы чыыр дээш чорупкан. Ол Раавтың оглу чораан. Ноеминни ооң берге үелеринде Руф деткип чораан деп, Вооз дыңнаан. Руфка шөлде тарааны бичии хөйнү арттырып турар кылдыр, ол ажылчыннарынга чагып каан.

 Ол-ла кежээ Ноемин Руфтан айтырган: «Кымның шөлүнде тараа чыып тур сен?» «Воозтуң» — деп, ол харыылаан. Ынчан Ноемин: «Вооз дээрге мээң ашаамның төрели-дир. Ооң шөлүнден тарааны өске уруглар-биле чыып тур. Аңаа сени кым-даа хомудатпас» — дээн.

Руф тараа ажаалдазы төнеринге чедир Воозтуң шөлүнче барып турган. Руфту ажылгыр-кежээ база аянныг кыс деп, Вооз эскерип каан. Ол үеде оолдары чок эр кижи чок апаар болза, төрели ооң дулгуяк арткан кадайынга өгленип алыр турган. Ынчангаш Вооз Руфка өгленип алган. Олар Овид дээр оолдуг апарган. Ол Давид хаанның кырган-ачазы-дыр. Ноеминниң эштери аажок өөрүп турган. Олар аңаа: «Эгезинде Иегова сен дээш сагыш човаар кылдыр Руфту берген. Ам сен уйнуктуг апардың. Ол дээш бүгү алдар Иеговага!» — дээн.