Ta lum Israel kʼax tulan wiʼnal. Jaʼ yuʼun jtul israel-ants te Noemí sbiil bajtʼ ta nainel ta skʼinal Moab sok te smamlal soknix te chaʼtul yalatak. Ta patil, laj te smamlal te Noemí. Te chaʼtul yalatak nujpunik sok moab-antsetik te jaʼik te Rut sok te Orfa (Orpá). Pero mel-oʼtantik sba te bin kʼax ta patil, melel jaʼnix jich laj te yalatak te Noemí.

Kʼalal te Noemí la yaʼiy stojol te maʼyukix wiʼnal ta Israel, la snop te ya sujt bael ta slumal. Jokinbil bael yuʼun te Rut sok te Orfa, pero kʼalal yakik ta beel-ae, te Noemí la yaltiklanbey: “Te jaʼexe lekil inamilex sok lekil alibalex. Ya jkʼan te yakuk xchaʼnujpunexe. Sujtanik bael ta Moab”. Te antsetik jich la yalik: “Kʼuxatkotik ta koʼtantik, ma jkʼantik te atukel ya xjilate”. Te Noemí bayal buelta la yaltiklanbey te yakuk sujtik bael ta slumalik. Jich yuʼun te Orfa sujt bael, pero te Rut jil stukel. Te Noemí la yalbey te Rut: “Te Orfa sujt bael ta slumal sok ta stojol te diosetik yuʼune. Baan-euk, sujtan ta sna te amamae”. Pero te Rut jich la yal: “Maba ya kijkʼitayat. Te alumale jaʼme jlumal ya xkʼot, te Dios awuʼune jaʼme Dios ya xkʼot kuʼun-euk”. ¿Bin-utʼil ya akuy te la yaʼiy sba te Noemí kʼalal jich albot yuʼun te Rute?

Te Rut sok te Noemí kʼotik ta Israel ta yorail stsobel te cebada. Ta jun buelta te Rut bajtʼ ta stamel awal tsʼunubil te ijkʼitaybil tey ta lumkʼinal yuʼun te Booz (Boaz), te jaʼ yal te Rahab. Te Booz ay la yaʼiy stojol te bitʼil te Rut jaʼ jtul moab-ants te jun yoʼtan yakʼoj sba ta stojol te Noemí sok te jaʼ sjokineje. Te Booz la yalbey te j-aʼteletik yuʼun te akʼa yijkʼitayikxan jtebuk te awal tsʼunubil ta lumkʼinal, yuʼun jich ya xjuʼ ya stam-a te Rute.

 Ta ajkʼabal-abi, te Noemí la sjojkʼoybey te Rut: “¿Machʼa skʼinal te banti aʼtejat te naxe?”. Te Rut jich la yal: “Ta skʼinal te Booz”. Te Noemí jich la yalbey: “Te Booz jaʼ sfamilia te jmamlale. Aʼtejan tey-a sok te yantik achʼixetike. Junukme awoʼtan tey-a”.

Te Rut aʼtej tey ta lumkʼinal yuʼun te Booz jaʼto kʼalal laj yorail stsobel te awal tsʼunubile. Te Booz la snaʼ stojol te bitʼil te Rut jaʼ jtul lekil ants sok te bayal ya x-aʼteje. Ta kʼajkʼal-abi, teme ay laj jtul winik te maʼyuk jilel snichʼnabe, te meʼba antse ya xjuʼ xnujpun sok jtul sfamilia te winike. Jich yuʼun te Booz nujpun sok te Rut. La staik jtul alal te la sbiilintesik Obed. Cheʼoxeb jaʼbil ta patil, te Obed jaʼ kʼot ta smamuch te ajwalil David. Te yamigatak te Noemí kʼax tseʼel yoʼtanik. Jich la yalulanbeyik: “Ta sbabial, te Jehová la yakʼbat te Rut te lek stalel la yakʼ ta ilel ta atojole, ta ora ini ayinix jtul amam. Kalbeytik yutsilal te Jehová ta swenta-abi”.