Ọke rẹ owẹnvwe vwo fi vwẹ Izrẹl, Naomi vẹ ọshare rọyen kugbe emeshare rayen ivẹ da kua nẹ Izrẹl kpo Moab. Ọke vwọ yanran na, ọshare rẹ Naomi de ghwu. Emeshare rọyen na da rọvwọn Rutu vẹ Ọrpa re dia eya rẹ Moab. Ọke ọvo vwo te, emeshare rẹ Naomi na de ji ghwu.

Naomi vwo nyo nẹ owẹnvwe rọhẹ Izrẹl na nẹ otọ re, o de brorhiẹn ro vwo rhivwin kpo. Rutu vẹ Ọrpa de nene, ẹkẹvuọvo ayen vwọ yanran, Naomi da vuẹ ayen nẹ, ‘Ovwan emamọ eya vwọ kẹ emọ mẹ kugbe emamọ emetẹ vwọ kẹ vwẹ. Me guọnọre nẹ ovwan rhoma rọvwọn. Ovwan rhivwin kpo Moab.’ Eya na da ta: ‘Avwanre vwo ẹguọnọ wẹn! Avwanre guọnọ yan juwevwo-o.’ Jẹ Naomi vuẹ ayen nẹ ayen rhivwin kpo. Ukuotọ rọyen, Ọrpa de rhivwin, ẹkẹvuọvo Rutu rhọnvwe kpo-o. Naomi da ta kẹ: ‘Ọrpa rhivwin bru ihwo vẹ eghẹnẹ rọyen ra re. Nene kpo.’ Ẹkẹvuọvo Rutu da ta: ‘Me cha yan juwevwo-o. Ihwo wẹn cha dia ihwo mẹ, Ọghẹnẹ wẹn cha dia Ọghẹnẹ mẹ.’ Mavọ wo rorori nẹ oma che ru Naomi ọke rẹ Rutu vwọ ta eta yena?

Rutu vẹ Naomi te Izrẹl vwẹ ọtonphiyọ rẹ ọke rẹ orhọ. Ẹdẹ ọvo Rutu da ra tọrọ eka ra kọrọ chekọ vwẹ aghwa rẹ ọshare ọvo re se Boaz, rọ dia ọmọ rẹ Rehab. Ọshare nana nyori nẹ Rutu ọyen ohwo rẹ Moab rọ fuevun kẹ Naomi. Ọ da vuẹ ewiowian rọyen nẹ ayen yanjẹ eka vwo vwẹ aghwa na rere Rutu mrẹ tọrọ.

 Ovwọnvwọn yena, Naomi da nọ Rutu: ‘Aghwa rẹ ono wọ da tọrọ eka nonẹna?’ Rutu da ta: ‘Aghwa rẹ ọshare ọvo re se Boaz.’ Naomi da vuẹ: ‘Boaz vẹ ọshare mẹ iniọvo. Biko kpo aghwa rọyen kọke kọke, wẹ vẹ eya na wian kugbe. O che kpokpo uwe-e.’

Ọkieje kọyen Rutu vwọ wian vwẹ aghwa rẹ Boaz re te ọke rẹ orhọ na vwo re. Boaz niroso nẹ Rutu ọgbowian kugbe omamọ aye. Vwẹ ọke awanre, ọshare rhe vwiẹ tavwen o ki ghwu-u, oniọvo rọyen kọ cha rọvwọn ayeuku na. Ọtiọyena, Boaz da rọvwọn Rutu. Ayen de vwiẹ ọmọshare re se Obed, rọ rhe dia ọsẹ rode rẹ Ovie Devid. Oma vwerhen igbeyan rẹ Naomi mamọ. Ayen da ta: ‘Ẹsosuọ, Jihova vwẹ Rutu kẹ wẹ, rọ dia omamọ aye, asaọkiephana ọ da rhoma kẹ wẹ uvwrọmọ. E jẹ e jiri Jihova.’