Tshifhingani tsha nḓala khulu kha ḽa Isiraele, Muisiraele ane a pfi Naomi o pfulutshela shangoni ḽa Moaba na munna wawe na vhana vhawe vhavhili vha vhatukana. Nga murahu munna wa Naomi a fa. Vhana vhawe vha vhinga Ruthe na Arepa, vhe vha vha vhe Vhamoaba. Zwi ṱungufhadzaho ndi uri nga u ya ha tshifhinga vhana vha Naomi vha fa.

Musi Naomi a tshi pfa uri nḓala yo fhela kha ḽa Isiraele, a phetha u vhuyelela hayani. Ruthe na Arepa vha ṱuwa nae, fhedzi musi vhe nḓilani, Naomi a vha vhudza a ri: ‘No vha vhafumakadzi vhavhuḓi kha vhana vhanga na mpfara zwavhuḓi sa vhafumakadzi vha vhana vhanga. Ndi ṱoḓa ni tshi vhingiwa hafhu. Vhuyelelani hayani ha vhoiwe Moaba.’ Vhafumakadzi vha ri: ‘Ri a ni funa! A ri ṱoḓi u ṱuwa ra ni sia.’ Naomi a vha kombetshedza uri vha hume. Mafheleloni, Arepa a huma, fhedzi Ruthe a sala nae. Naomi a ri khae: ‘Arepa u khou vhuyelela kha vha hawe na kha midzimu ya hawe. Ṱuwani nae.’ Fhedzi Ruthe a ri: ‘A thi nga ḓo ni sia. Vhathu vha haṋu vha ḓo vha vhahashu nahone Mudzimu waṋu u ḓo vha Mudzimu wanga.’ Ni humbula uri Naomi o ḓipfa hani musi Ruthe a tshi amba zwenezwo?

Ruthe na Naomi vho swika Isiraele mathomoni a khaṋo ya bali. Ḽiṅwe ḓuvha, Ruthe a yo dobela bali tsimuni ya muṅwe munna ane a pfi Boasi, we a vha e ṅwana wa Rahaba. O vha o no zwi pfa uri Ruthe ndi Mumoaba we a dzula na Naomi nga u fulufhedzea. A vhudza vhashumi vhawe uri vha sie bali yo eḓanaho u itela uri Ruthe a dobele.

 Nga madekwana, Naomi a vhudzisa Ruthe a ri: ‘No vha ni tshi khou shuma tsimuni ya nnyi ṋamusi?’ Ruthe a ri: ‘Tsimuni ya munna ane a pfi Boasi.’ Naomi a ri: ‘Boasi ndi muṅwe wa shaka ḽa munna wanga. Bvelani phanḓa ni tshi shuma tsimuni yawe na vhaṅwe vhasidzana. Ni ḓo vha no tsireledzea henefho.’

Ruthe a bvela phanḓa a tshi shuma tsimuni ya Boasi u vhuya u swika khaṋo i tshi fhela. Boasi a ṱhogomela uri Ruthe u a shuma nga maanḓa nahone ndi mufumakadzi o lugaho. Misini yeneyo, arali munna a fa e si na ṅwana wa mutukana, shaka ḽawe ḽo vha ḽi tshi vhinga mufumakadzi wawe. Nga zwenezwo Boasi a vhinga Ruthe. Vha wana ṅwana ane pfi Obede, we nga murahu a vha makhulu a Khosi Davida. Khonani dza Naomi dzo vha dzo takala vhukuma. Dza ri: ‘Yehova o thoma nga u ni fha Ruthe, we a ni fara zwavhuḓi nahone zwino no wana muḓuhulu. Kha ri hulise Yehova.’