Okathi wa etala wIsarayeli, muthiyana mmosa aitthaniwa Nowemi ni iyawe, vamosa ni anaawe anli alopwana, yaahithaamela oMowabi. Nuuvira okathi iyawe Nowemi aahikhwa. Anamwane ale yaahaathela athiyana a oMowabi. Mmosa aitthaniwa Ruthi vano mukina, Orpa. Mooriipiha murima, nuuvira okathi anaawe Nowemi yaahikhwa.

Okathi Nowemi aiwale awe wira etala yaahimala wIsarayeli, aahuupuwela otthikela elapo awe. Ruthi ni Orpa yaahimutthara, masi yeettaka siiso Nowemi aahaaleela wira: ‘Nyuwosa khimureere owiirela itthu sooreera anaaka ni miyo. Kimphavela wira mutheliwe-tho ni alopwana akina. Vano muhokolowele elapo anyu oMowabi’. Athiyana awo yaahaakhula wira: ‘Hiyo ninnoophentani! Khanimphavela woohiyani’. Nowemi aahaathipelela wira etthikase. Vano Orpa aahitthika, masi Ruthi aahikhootta. Nowemi aahimuleela Ruthi wira: ‘Orpa ootthikela elapo awe ni amuluku awe. Nyuwo-tho muhokoloweke’. Masi Ruthi aahihimya wira: ‘Nkintthuna woohiyani. Atthu anyu anrowa okhalaka atthu aka: Muluku anyu onrowa okhalaka Muluku aka’. Munoonela sai, niireke moolumo ale yaahimusivela Nowemi?

Ruthi ni Nowemi yaahiphiya wIsarayeli okathi woohepha etrigu. Nihiku nimosa, Ruthi aahirowa ottotta etrigu mmatta mwa mulopwana mmosa aitthaniwa Bowazi, yoowo aari mwaana a Rahabi. Bowazi aahiiwa wira Ruthi a nloko na oMowabi aahimureerela murima Nowemi. Owo aahaaleela anamuteko awe wira yaahaana ohiya mavisi makina a etrigu wira Ruthi attotteke.

 Ohiyu yoole Nowemi aahimukoha Ruthi wira: ‘Olelo mwaattootta aavara muteko ematta xeeni?’ Ruthi aahaakhula wira: ‘Kaattotta mmatta mwa mulopwana oniitthaniwa Bowazi’. Nowemi aahimuleela wira: ‘Bowazi mmusi aya aiyaka. Nvikaniheke ottotta mmatta mwawe ni aximwali awe akina wira muhitupheliwe’.

Ruthi aahivikaniha mmatta mwa Bowazi mpakha ovira okathi woohepha. Bowazi aahiweha wira Ruthi aari muthiyana ooreera murima ni oovara muteko. Okathi ole, nlamulo na Muluku naahimya wira akhwa mulopwana oothela ohinatthi waayara anamwane, mmusi awe aahaana omuthela muthiyana ole okhweliwe. Ti maana aya Bowazi aamuthenle awe Ruthi. Awo yaahimuyara mwaana aitthaniwa Obedi, yoowo nuuvira okathi aakhanle taata awe Davidi. Apatthani awe Nowemi yaahihakalala vanceene. Awo yaanihimya wira: ‘Yehova ohoovahani Ruthi yoowo oophentaleni vanceene ooyarelakani mwaana. Yehova ottottopeliwe’.