Han nagkaada gutom ha Israel, bumalhin ha Moab an Israelita nga hi Noemi upod an iya bana ngan duha nga anak. Paglabay han panahon, namatay an iya bana. An iya mga anak nag-asawa hin mga Moabitanhon, hira Ruth ngan Orpa. Makasurubo, ha urhi, namatay an iya mga anak.

Han hinbaroan ni Noemi nga waray na gutom ha Israel, nagdesisyon hiya nga umuli. Hira Ruth ngan Orpa inupod ha iya, pero samtang nagbabaktas hira, ginsidngan hira ni Noemi: ‘Maopay kamo nga mga asawa ha akon mga anak ngan maopay kamo nga mga umagad. Karuyag ko mag-asawa kamo utro. Balik kamo ha Moab.’ Hira nagsiring: ‘Hinigugma ka namon! Diri ka namon babayaan.’ Ginsinidngan hira ni Noemi nga bumalik. Ha urhi, binalik hi Orpa pero hi Ruth nagpabilin. Hi Noemi nagsiring ha iya: ‘Hi Orpa nabalik ha iya katawohan ngan ha iya mga dios. Uli na upod ha iya, ngan pakadto ha balay han imo nanay.’ Pero hi Ruth nagsiring: ‘Diri ko ikaw babayaan. An imo katawohan magigin akon katawohan, ngan an imo Dios magigin akon Dios.’ Ano daw la an gin-abat ni Noemi han ginsiring ito ni Ruth?

Inabot ha Israel hira Ruth ngan Noemi ha tinikangan han kat-ani han sebada. Usa ka adlaw, hi Ruth kinadto ha uma ni Boas nga anak ni Rahab, basi mamurot hin mga salin nga sebada. Hinbaroan ni Boas nga hi Ruth usa nga Moabitanhon nga maunungon nga waray bumaya kan Noemi. Ginsidngan ni Boas an iya mga trabahador nga magbilin hin dugang nga sebada basi puruton ni Ruth.

 Hito nga gab-i, hi Noemi nagpakiana kan Ruth: ‘Kan kanay ka uma namurot yana?’ Hi Ruth nagsiring: ‘Ha uma han lalaki nga hi Boas.’ Hi Noemi nagsiring: ‘Hi Boas paryente han akon bana. Didto la pamurot ha iya uma kaupod han iba nga batan-on nga babaye. Talwas ka didto.’

Hi Ruth padayon nga nagtrabaho ha uma ni Boas tubtob ha kahuman han kat-ani. Nakita ni Boas nga maduruto hi Ruth ngan maopay gud nga babaye. Ha ira panahon, kon an inasaw-an nga lalaki mamatay nga waray anak nga lalaki, pangangasaw-on han iya paryente an iya nabalo nga asawa. Salit nagin asawa ni Boas hi Ruth. Nagkaanak hira hin lalaki, hi Obed, nga nagin lolo ni Hadi David. Nalipay gud an kasangkayan ni Noemi. Hira nagsiring: ‘Siyahan, iginhatag ni Jehova ha imo hi Ruth nga buotan gud ha imo, ngan yana may apo ka na. Pagdayawon hi Jehova.’