Tu luʼumil Israeleʼ anchaj wiʼijiliʼ. Le oʼolal juntúul israelita tu kʼaabaʼtaj Noemieʼ bin kajtal tu luʼumil Moab yéetel u yíicham bey xan yéetel u kaʼatúulal u paalal. Ka máan kʼiineʼ kíim u yíicham Noemí. U paalaleʼ tsʼoʼok u beeloʼob yéetel kaʼatúul moabitaʼob: Rut yéetel Orpá. Chéen baʼaleʼ ka máan kʼiineʼ kíim xan tu kaʼatúulal u paalal Noemí.

Le ka tu yojéeltaj Noemí tsʼoʼok u yantal baʼal jaantbil tu luʼumil Israeleʼ, suunajiʼiʼ. Rut yéetel Orpaeʼ binoʼob tu yéetel, chéen baʼaleʼ teʼ bejoʼ Noemieʼ tu yaʼalajtiʼob: ‹Teʼexeʼ tsʼoʼok a weʼeskeʼex jach maʼalob atantsileʼex yéetel jach maʼalob ilibtsileʼex. In kʼáat ka tsʼoʼokok a beeleʼex tu kaʼatéen. Suunakeʼex ta wotocheʼex yaan Moaboʼ›. Letiʼobeʼ tu yaʼaloʼobtiʼ: ‹Toʼoneʼ jach k-yaabiltmech. Maʼ ken k-pʼatech›. Noemieʼ maʼ xuʼul u yaʼaliktiʼob ka xiʼikoʼobiʼ. Ka tsʼoʼokeʼ Orpaeʼ bini, chéen baʼaleʼ Ruteʼ maʼ biniʼ. Noemieʼ tu yaʼalajtiʼ: ‹Orpaeʼ tsʼoʼok u suut tu kaajal utiaʼal u adorartik u diosoʼob. Xeen tu yéetel utiaʼal a suut tu yotoch a maama›. Chéen baʼaleʼ Ruteʼ tu yaʼalajtiʼ: ‹Maʼ ten in pʼatech. A kaajaleʼ yaan u kʼuchul u beetuba in kaajal yéetel a Dioseʼ yaan xan u kʼuchul u beetuba in Dios›. ¿Bix ta tʼaan tu yuʼubiluba Noemí le ka aʼalaʼabtiʼ leloʼ?

Rut yéetel Noemieʼ kʼuchoʼob tu luʼumil Israel tu kʼiinil táan u káajal u joʼochol cebadaoʼ. Juntéenjeakeʼ Ruteʼ bin u mool u neekʼ le cebada pʼaatal ichil u kool Boazoʼ, letiʼ kaʼacheʼ u hijo Rahab. Boazeʼ tu yojéelteʼ Ruteʼ tiʼ u taal tu luʼumil Moab, chúukpaj u yóol u yáant Noemí yéetel pʼáat tu yéetel. Letiʼeʼ tu yaʼalaj tiʼ u j-meyajoʼob ka u chaʼob u júutul junpʼíit maas tiʼ u neekʼ le cebadaoʼ utiaʼal u molik Rut.

 Teʼ áakʼab jeʼeloʼ, Noemieʼ tu kʼáataj tiʼ Rut: ‹¿Máax kool meyajnajech bejlaʼeʼ?›. Ruteʼ tu yaʼalajtiʼ: ‹Tu kool Boaz›. Noemí túuneʼ tu yaʼalajtiʼ: ‹Boazeʼ u láakʼtsil in wíicham. Seguernak a meyaj tu kool yéetel le uláakʼ x-chʼúupalaloʼoboʼ. Teʼeloʼ maʼ kun beetbiltech mix baʼaliʼ›.

Ruteʼ seguernaj u meyaj tu kool Boaz tak ka tsʼoʼok u kʼiinil le joochoʼ. Boazeʼ tu tsʼáaj cuentaeʼ Ruteʼ jach jatsʼuts u modos yéetel jach meeyjil. Teʼ kʼiinoʼoboʼ ken kíimik juntúul xiib minaʼan u paalaleʼ, juntúul u láakʼtsileʼ jeʼel u páajtal u tsʼoʼokol u beel yéetel u yatan le máax kíimoʼ. Le oʼolal Boazeʼ tsʼoʼok u beel yéetel Rut. Anchaj juntúul u hijoʼob, tu kʼaabaʼtaj Obed. Ka máan kʼiineʼ Obedeʼ kʼuch u beetuba u abuelo rey David. U amigaʼob Noemieʼ jach kiʼimakchaj u yóoloʼob. Ku yaʼalikoʼob kaʼach tiʼ: ‹Yáaxeʼ Jéeobaeʼ tu tsʼáajtech Rut, letiʼeʼ jach tsʼoʼok u yeʼesiktech u yutsil. Beoraaʼ yaantech juntúul a wáabil. Unaj k-alabartik Jéeoba yoʼolal leloʼ›.