Guyuu ti tiempu maʼ qué ñuu ni ñó binni ndaaniʼ guidxi Israel. Ngue runi biree ti gunaa israelita ni láʼ Noemí né xheelaʼ ne ca xiiñiʼ zindézacaʼ Moab. Despué guti xheelaʼ Noemí. Bichaganáʼ ca xiiñibe chupa gunaa de Moab: Rut ne Orpá. Peru triste ni bizaaca despué purtiʼ laaca guti guiropa xiiñiʼ Noemí.

Ora gunna Noemí maʼ nuu ni gó binni Israel gudixhe ique guibiguetaʼ xquidxi. Bibiguetané Rut ne Orpá laabe, peru neza zécabe que gudxi Noemí laacabe: «Nachaʼhuiʼ gúcatu né xheelatu ne laaca nacháʼhuitu né naa. Ñuuladxeʼ nichaganatu sti biaje. Laguibiguetaʼ Moab». Ca gunaa que gúdxicaʼ laabe: «Guizáʼ nadxiidu lii, qué racaláʼdxidu gusaanadu lii stúbiluʼ». Stale biaje gunabaʼ Noemí laacabe guibiguétacabe xquídxicabe. Últimu bibiguetaʼ Orpá peru Rut qué niná nibiguetaʼ. Gudxi Noemí Rut: «Maʼ zeʼ Orpá xquidxi ne ra nuu ca dios stiʼ. Guyé yenanda laabe». Peru Rut bicabi laabe: «Qué zusaana lii. Xquídxiluʼ zaca xquidxeʼ ne Dios stiluʼ zaca Dios stinneʼ». ¿Ximodo rábiluʼ biʼniʼ sentir Noemí ora gudxi Rut ndiʼ laa yaʼ?

Yendá Rut ne Noemí guidxi Israel tiempu ruzulú riasa cosecha stiʼ cebada. Ti dxi, yetopa Rut cebada lu layú stiʼ ti hombre láʼ Boaz, hombre riʼ xiiñiʼ Rahab laa. Binadiaga Boaz qué niná Rut nusaana Noemí, ngue runi gúdxibe ca hombre runi dxiiñaʼ lu layú stibe gusaanacaʼ caadxi cebada para gutopa Rut.

 Gueelaʼ que, gunabadiidxaʼ Noemí Rut: «¿Tu lu layú stiʼ biʼnuʼ dxiiñaʼ yannadxí?». Bicabi Rut laabe: «Lu layú stiʼ Boaz». Para ná Noemí: «Familia stiʼ xheelaʼ nga Boaz. Biʼniʼ dxiiñaʼ lu layú stibe né ca baʼdudxaapaʼ runi dxiiñaʼ racá. Ti cadi chuʼ tu guchiichi lii».

Biʼniʼ Rut dxiiñaʼ lu layú stiʼ Boaz dede ora biluxe cosecha que. Bidii Boaz cuenta naca Rut ti gunaa nachaʼhuiʼ ne runi dxiiñaʼ. Tiempu que, pa gatiʼ ti hombre ne qué ñapa xiiñiʼ la? ti familia stibe zanda guichaganáʼ xheelabe. Ngue runi bichaganáʼ Boaz Rut. Gúpacabe ti xiiñicabe ne gulee lácabe laa Obed. Stale iza despué, beeda gaca Obed bixhozebiidaʼ rey David. Ca xhamiga Noemí guizáʼ biéchecaʼ. Gúdxicabe laabe: «Primé la? bidii Jiobá lii ti gunaa guizáʼ nachaʼhuiʼ ne nadxii lii. Ne yanna maʼ nápaluʼ ti nietu. Gusisácanu Jiobá pur guiráʼ ndiʼ».