Ngéda i bi tagbe bañ, Lôk Israel i témb i kôm Yéhôva mbus, i bôdôl bégés bisat. Lôk Midian i bé nip bilém bi bon ba Israel, i ôbhak nwom nwap; ba bi boñ hala nwii minsaambok. Inyu ke bo ngwéé, Lôk Israel i bé solop ikété bihôk bi maa, yak i ngii dikôa. Ba kahal yemhe Yéhôva le a tohol bo. Yéhôva a om añgel yak mañge wanda le Gidéôn, i kal nye le: ‘Yéhôva a mpohol we inyu ba mpémba mut gwét.’ Gidéôn a bat le: ‘Lelaa me nla tohol Lôk Israel? Nga me ta bé to yom.’

Lelaa Gidéôn a bi yi le Yéhôva a bi pohol nye? A bi tek pes libadô isi, a kal Yéhôva le: ‘Bikegla, ibale manwee ma mba mu ngii pes libadô yotama, ndi hisi hiosôna hi bak nnumuk, m’a yi le u nsômbôl le me tohol Israel.’ Maye ma kel, libadô li bé nyook, ndi hisi hi bé nnumuk! Ndi Gidéôn a bat ki Yéhôva le yani bikegla, libadô li ba nnumuk, ndi hisi hi ba nyook. Kiki hala a mbôña, Gidéôn a sôk ba nkwook nkaa le Yéhôva a mpohol toi nye. A kot bisônda gwé inyu jôs Lôk Midian.

 Yéhôva a kal Gidéôn le: ‘Me ga ti Israel yémbél. Ndi inyule ni gwé ngandak bisônda, ni ga hoñol le bébomede bon ni nyémbél. Kal nu ni nu a nkon woñi le a huu i mbai yé.’ Ha nyen 22 000 ma bisônda ma témb i mambai map, ndi 10 000 i yégle. Yéhôva a kal ki le: ‘Bisônda bi ngi yii ngandak. Kena bo lép, u kal bo le ba nyo malép. U yégla ndik i bet ba ga nyo, ba béñgege ibale baoo ba ntiige.’ Ndigi 300 i bôt yon i bi yégle. Yéhôva a bôn le, ini ndék bôt, yon y’a bép 135 000 bisônda bi Lôk Midian.

I u u, Yéhôva a kal Gidéôn le: ‘Nano ngéda i nkola i leñ Lôk Midian gwét!’ Gidéôn a ti bôt bé dioñ (disésé) ni dimbôga lôñni nwai (bilambe) nsôôak mukété. A kal bo le: ‘Nuna me, ni boñ nlélém kiki me.’ Gidéôn a hem hisésé hié, a bol libôndô jé, a nyiñgis nwai wé, ndi a lond le: ‘Pansoñ i Yéhôva ni i Gidéôn!’ Ngéda 300 i bôlom yosôna i boñ nlélém, Lôk Midian i kon woñi ngandak, i kahal ke ngwéé mbôk yosôna. Mukété yubda ikéñi i, Lôk Midian i kahal jo bo ni bo. Yak lini lisañ, Yéhôva a nhôla Lôk Israel i yémbél baoo bap.