Di pudian ni ari, ndang manomba Jahowa be bangso Israel. Saleleng pitu taon, sai ditangko halak Midian do pinahan dohot panen ni bangso Israel. Alani i, martabuni ma bangso Israel tu gua manang tu dolok-dolok. Martangiang ma nasida tu Jahowa asa dipalua. Disuru Jahowa ma sada suru-suruan manang malaikat manjumpangi sahalak baoa na poso na margoar si Gidion. Didok suru-suruan i ma, ‘Nunga dipillit Jahowa ho gabe tentara na jago.’ Alai disungkun si Gidion ma, ‘Songon dia ma bahenonku paluahon bangso Israel? Ai ndang halak na jago ahu.’

Sian dia do diboto si Gidion na dipillit Jahowa ibana? Dibahen si Gidion ma abit wol tu tano. Didok ma tu Jahowa, ‘Marsogot pagi, molo maraek abit on alani ombun hape koring do tano i, huboto ma na dipillit Ho do ahu.’ Marsogotna i, maraek ma abit wol i alai koring do tano i! Dung i, dipangido si Gidion ma muse asa koring abit i jala maraek tano i marsogotna i. Masa ma songon i. Gabe pos ma roha ni si Gidion na dipillit Jahowa do ibana. Dung i dipapungu ibana ma angka tentara laho mangalo halak Midian.

 Didok Jahowa ma tu si Gidion, ‘Monang do bahenonku bangso Israel. Alai ala pagodanghu tentaramon, gabe dirimpu hamu ma annon alani gogomuna hamu monang. Alani i, suru ma mulak angka tentara na mabiar.’ Mulak ma 22.000 tentara. Tinggal ma 10.000 tentara nai. Alai didok Jahowa ma muse, ‘Pagodanghu dope on. Boan ma nasida tu sunge jala suru ma nasida minum. Pillit ma tentara na sai rade mangalo musu nang pe tingki minum.’ Holan 300 do tentara na songon i. Alai marjanji do Jahowa boi do nasida monang mangalo 135.000 tentara ni Midian.

Dung borngin, didok Jahowa ma tu si Gidion, ‘Alo ma halak Midian i saonari!’ Dilehon si Gidion ma tu angka tentarana tarompet na sian tanduk dohot gunsi na balga na marisi obor. Didok ibana ma tu nasida, ‘Ihuthon ma songon na hubahen on.’ Diombus si Gidion ma tarompetna, diponcahon ma gunsina, jala diangkat ma oborna. Didok ma gogo, ‘Podang ni Jahowa dohot podang ni si Gidion!’ Dung i dohot ma na 300 tentara i mambahen songon i. Gabe mabiar ma halak Midian jala marlarian ma nasida. Alani bingungna, gabe marsipamatean ma nasida. On patuduhon, diurupi Jahowa do bangso Israel mangalo musu ni nasida.