Ilyo papitile inshita, abena Israele na kabili balilekele ukupepa Yehova no kutendeka ukupepa tulesa twa bufi. Pa myaka 7, abena Midiani baleibila abena Israele inama kabili balebonawila ifyo balelima. Pa kuicingilila ku bena Midiani, abena Israele balefisama mu ncengo e lyo na mu mpili. Abena Israele bapapeete Yehova ukuti abapusushe. E ico Yehova atumine malaika kuli Gideone. E lyo malaika aebele Gideone ati: ‘Yehova nakusala ukuba impalume ya bulwi.’ Gideone aipwishe malaika ati: ‘Bushe nkapususha shani Israele? Apo ndi wacabecabe fye.’

Bushe Gideone ali no kwishiba shani ukuti ni Yehova wa musalile? Abikile amasako ya mpaanga pa nshi kabili aebele Yehova ati: ‘Umume nga waikala fye ku masako yeka e lyo pa mushili pashala apauma e lyo nalaishiba ukuti mulefwaya impusushe Israele.’ Ubushiku bwakonkelepo ulucelo, amasako ya mpaanga yalibombele lelo umushili wena tawabombele! Na lyo line Gideone aebele Yehova ukuti ubushiku bukonkelepo ulucelo amasako yekabomba lelo umushili e o ukabombe. Ilyo ifi fyacitike, Gideone alishininkishe ukuti Yehova e wamusalile. E ico alilonganike abashilika abakuyalwa na bena Midiani.

 Yehova aebele Gideone ati: ‘Nkalenga abena Israele bakacimfye. Lelo apo naukwata abashilika abengi sana, nga wacimfya ukalamona kwati ucimfishe ku maka yobe. Webe abashilika abali no mwenso ukuti babwelelemo ku ng’anda.’ Abashilika 22,000 balibwelelemo ku ng’anda e lyo 10,000 e bashele. Lyena Yehova aebele Gideone ati: ‘Abashilika abashele nabafulisha. Batwale ku mumana kabili ubebe ukuti banwe amenshi. Abalanwa amenshi uku ninshi balemona nga kuli abalwani, abo bene ebo ushale nabo.’ Abashilika 300 e balenwa amenshi uku ninshi balemona abalwani nga baleisa. Yehova alaile Gideone ati ali no kulenga aba abaume abanono ukucimfya abashilika abena Midiani 135,000.

Mu nshita ya bushiku, Yehova aebele Gideone ati: ‘Imeni komeni abena Midiani!’ Gideone apeele abashilika bakwe amapenga ne mitondo iikalamba kabili mu kati ka mitondo mwali ifyenge. Gideone aebele abashilika ati: ‘Mumone ifyo nalacita e lyo na imwe mucite ifyo fine.’ Gideone alishishe ipenga lyakwe, atoba umutondo, no kwimya ifyenge mu muulu kabili atile: ‘Ulupanga lwa kwa Yehova no lwa kwa Gideone!’ Ifi fine e fyo na baume 300 bacitile. Abena Midiani balitiinine kabili balibutwike. Apo balifulunganishiwe, batendeke ukwipayana. Na uno wine muku, Yehova alyafwile abena Israele ukucimfya abalwani babo.