Bon b’Israël be nga beta lume Yéhôva mvus, a taté na ba kañe bivus bezambe. Bemadianite be mbe be boya mimbu zangbwal be wôlé’é be betit, be ndamane fe be mefup. Ane bon b’Israël be nga tup, a ke sobô minkôl a mimbase meko’o si. Nde be nga ye’elane Yéhôva na a nyii be. Ane Yéhôva a nga lôm éngele wé be ndôman é to jôé na Gédéon. Éngele a nga jô nye na: ‘Wo Yéhôva a tobeya na ô nyii Israël.’ Nde Gédéon a nga yalane na: ‘Aval avé me ne nyii Israël? Me ne zezé jôm.’

Aval avé Gédéon a mbe ve yeme na nnye Yéhôva a tobeya? A nga nyoñ éfus éndelé, a bôône je tyia. Éyoñ éte a nga ye’elane Yéhôva na: ‘Nge mame tyé, me zu koone na, élo’o ja te boté éndelé ji, é teke boté si, m’aye yeme na, wo yi na me nyii Israël.’ Éyoñe tyé é nga lende, mendim me nga boté éndelé, ve si é mbe nkôt! Ve Gédéon a nga beta jô Yéhôva na a bo na, mame tyé mevok, élok é boté si, é teke boté éndélé. Éyoñe nalé a bobaneya, Gédéon a nga yeme na, nnye fo’o Yéhôva a tobeya. Nde a nga nyoñe bezimbi bé mfa’a ya ke wosane Bemadianite.

 Yéhôva a nga jô Gédéon na: ‘M’aye ve bon b’Israël medañ. Ve ô ne viane buni na, wo te dañe bita, amu ô bili abui bezimbi. Kate’e môt ase a ko woñ na a bulane nda jé.’ Ane bezimbi 22 000 be nga bulane menda map; ba be nga li’i be mbe 10 000. Ve Yéhôva a nga beta jô na: ‘Bezimbi bete be ngenan abui. Kele’e be anjeñ, a jô’ô be na be nyu mendim. Wo ye li’i ve a bezimbi ba ye nyu mendim, be fombô’ô nge besiñe bap ba zu.’ Bôt 300 étam mbe be nga nyu nalé. Yéhôva a nga ka’ale na, mone nsamba bôt ate a ye dañ bezimbi 135 000 ya Madian.

Alu ete ebien, Yéhôva a nga jô Gédéon na: ‘Éyoñe ya wosane Bemadianite é kuiya!’ Ane Gédéon a nga ve bôte bé metoñ, a beta mendek. A nga jô be na: ‘Fomba’ane ma, mi bo ane ma bo.’ Ane Gédéon a nga loñe toñ, a bôé nde’e jé, a nyoñ ômese wé, a yôtane na: ‘Nkpwaté mekône Yéhôva a wu Gédéon!’ Ane bôte 300 bé be nga bo avale da. Bemadianite be nga dañe ko woñ a tup mimfa’a mise. E jo’ojo’o été va, be nga taté na ba wôéane be be, môt ase a ba’é nyô mbo’o nkpwaté mekôn. Yéhôva a nga volô bone b’Israël na be beta dañ besiñe bap.